Աֆղանստանում ափիոնի կակաչի բերքը 2013 թվականին հասել է ռեկորդային մակարդակի՝ ասվում է Պետդեպի զեկույցում: Այս մասին փոխանցում է BBC-ն:
ԱՄՆ-ը 13 տարում 7.6 մլրդ դոլար է ծախսել՝ փորձելով կրճատել Աֆղանստանում ափիոնի կակաչի ցանքատարածությունները:
Այդ միջոցները ծախսվել են թմրանյութերի դեմ պայքարի կազմակերպման, ինչպես նաև գյուղացիներին ֆինանսական օգնություն տրամադրելու վրա՝ խթանելու նրանց անցումը այլ գյուղատնտեսական արտադրանքի աճեցմանը:
Չնայած դրան, 2013-ին Աֆղանստանում ափիոնի կակաչի ցանքատարածությունները կազմել են 209 հազար հեկտար: ՄԱԿ-ի տվյալներով՝ այդ բերքն արժե մոտ 3 մլրդ դոլար, ինչը 50 տոկոսով ավելի է, քան 2012-ին:
Աֆղանստանի վերակառուցման նախագծերի հարցերով հատուկ տեսուչ Ջոն Սոպկոյի խոսքով՝ անվտանգության հետ կապված իրավիճակի վատթարացման և ցանքատարածությունների ոչնչացմանն ուղղված աշխատանքի ցածր մակարդակի ֆոնին 2014-ին պետք է սպասել կակաչի արտադրության աճի:
