Բրիտանուհի Դանիել Ուոթսոնը քաղցկեղով հիվանդ է ձևացել և իր բուժման համար նվիրաբերված գումարները ծախսել է սեփական հարսանիքը կազմակերպելու վրա, հաղորդում է The Independent-ը:
2012թ. հունվարին Քոլչեստերի բնակչուհին տեղի թերթերով և ամսագրերով հայտարարություն է տվել այն մասին, որ չորրորդ փուլում գտնվող քաղցկեղով է հիվանդ և ավելացրել է, որ հիվանդության պատճառով ստիպված է տեղափոխել հարսանիքի օրը, քանի որ ցանկանում է այն քիմաթերապիայից առաջ անցկացնել:
Երիտասարդ հարսնացուի պատմությունը գրավել է Քոլչեստերի բնակիչների ուշադրությունը, ովքեր ընդհանուր ջանքերով ավելի քան 10 000 ֆունտ են հավաքել, որն էլ նախատեսված է եղել քաղցկեղի դեմ նորագույն մեթոդների համար վճարմանը:
Դրամական միջոցների հավաքման ժամանակ բրիտանուհին իր հիվանդությունը ապացուցող փաստաթղթեր չի ներկայացրել և պահանջել է, որ գումարները անմիջապես իր անձնական հաշվեհամարին փոխանցվեն:
Հարսանիքը կայացել է 2012թ. ապրիլին, իսկ հունիսին սոցցանցի կնոջ էջում ծանուցոմ է հայտնվել այն մասին, որ նա հղի է:
«Հիվանդի» վարքագիծը կասկածներ է առաջացրել գումար նվիրաբերած քաղաքացիների մոտ և նրանք ոստիկանություն են զանգահարել:
Բրիտանուհին վեց անգամ հրաժարվել է ընդունել խարդախության մասին մեղադրանքը, սակայն այս շաբաթվա սկզբին ընդունել է իր մեղքը:
Կնոջ փաստաբանը նշում է, որ նա շատ է վախենում բանտ ընկնելուց, քանի որ մեկուկես տարեկան երեխա ունի և մեկ ամսից կծնվի նրա երկրորդ երեխան:
Ներկա պահին երիտասարդ մայրիկը գրավի դիմաց բաց է թողնվել: Վերջնական վճիռը կհրապարակվի հունվարի 9-ին:
