Հռոմի պապ Ֆրանցիսկոսը Թուրքիա իր առաքելական այցի ժամանակ նոյեմբերի վերջին կհանդիպի երկրի նախագահ Ռեջեփ Թայիփ Էրդողանի և Կոնստանդնուպոլսի ուղղափառ եկեղեցու ղեկավար Բարդուղիմեոս պատրիարքի հետ: Այս մասին գրում է RIA NOVOSTI-ն` վկայակոչելով Սուրբ գահի կնքիների ծառայության պետ Ֆեդերիկո Լոմբարդիին:
Քահանայապետի եռօրյա այցը Թուրքիա կսկսվի նոյեմբերի 28-ին: Ծրագիրը կբացվի Անկարա այցով, որտեղ քահանայապետը նախ կայցելի Թուրքիայի Հանրապետության առաջին նախագահ Քեմալ Աթաթուրքի գերեզմանին, ապա կհանդիպի գործող նախագահ Էրդողանի հետ, նախատեսված է նաև հանդիպում վարչապետ Ահմեդ Դավութօղլուի հետ:
Երկրորդ օրը քահանայապետը Անկարայից Ստամբուլ կմեկնի, որտեղ կայցելի Սուրբ Սոֆիայի տաճար և Կապույտ մզկիթ, ինչպես նաև քարոզ կկարդա Սուրբ Հոգու տաճարում: Նոյեմբերի 29-ին նախատեսված է հանդիպում Կոնստանդնուպոլսի ուղղափառ եկեղեցու ղեկավար Բարդուղիմեոս պատրիարքի հետ: Երրորդ օրն արդեն նրանք համատեղ հայտարարություն կստորագրեն և միասին կճաշեն: