Րաֆֆի Հովհաննիսյանն ամեն դեպքում մասնակցելու է հոկտեմբերի 24-ին տեղի ունենալիք եռյակի հանրահավաքին։ Այդ մասին քիչ առաջ Ազգային ժողովոււմ եռյակի նիստից հետո հայտնեց «Ժառանգություն» խմբակցության ղեկավար Ռուբիկ Հակոբյանը։
Հիշեցնենք, որ օրեր առաջ Ր.Հովհաննիսյանը չէր հաստատել, որ կմասնակցի հոկտեմբերի 24-ի հանրահավաքին։ «Պարզապես դրել ենք մի հարց. որ հարթակը լինի միասնական, ունենա միասնական ճանապարհային քարտեզ»,- ասաց Ռ.Հակոբյանը։
Իսկ արդյոք եռյակի առաջնորդները հանդիպելո՞ւ են մինչև հանրահավաքը կամգուցե չեն էլ հանդիպելո՞ւ։ Ռ.Հակոբյանն այնուամենայնիվ կարծում է, որ կհանդիպեն:
Անդրադառնալով անցած՝ հոկտեմբերի 10-ի հանրահավաքին, Ռ.Հակոբյանն ասաց, որ ժողովուրդն իրենցից միասնություն էր ակնկալում։
Լրագրողների հարցին, թե եռյակում չե՞ն քննարկվել «Ժառանգության» պատգամավոր Զարուհի Փոստանջյանի առաջարկությունները, Ռ.Հակոբյանը պատասխանեց, որ դրանք իրենց կուսակցության վարչությունում չեն քննարկվել։ Իսկ եռյակում քննարկվում են այն հարցերը, որոնք ստացել են վարչության համաձայնությունը։
Իսկ հոկտեմբերի 24-ին եռյակն ի՞նչ է ասելու ժողովրդին, նորից ելույթների հանրահավա՞ք է լինելու, թե՞ գործի: Ռ.Հակոբյանը պատասխանեց, թե ժողովուրդը հոգնել է խոսքից և ակնկալում է տեսնել միասնական հարթակ ու մատչելի ճանապարհային քարտեզ։ Իսկ այդ քարտեզը պետք է բերի իշխանափոխության։ Իսկ այդ իշխանափոխությունը 2017-2018 թվականների՞ն է լինելու: Ի պատասխան այդ հարցի՝ Ռ.Հակոբյանն ասաց՝ այդ մասին կիմանաք հանրահավաքին։
Եռյակը քննարկել է նաև այս քառօրյայի հետ կապված մի հարց, որը վերաբերում է իրենց ներկայացրած նախագծին: Երեկ եռյակը ստորագրահավաքով ներկայացրել էր հայտարարության մի նախագիծ, որը կոչվում էր «Հայաստանի Հանրապետությունում առաջացած կառավարման ճգնաժամի մասին» հայտարարության նախագիծը և ԱԺ որոշման նախագիծ, որը վերաբերում է 100 տոկոսանոց համամասնական ընտրակարգին անցնելուն։ Ընդ որում՝ այս երկու նախագծերն էլ ներկայացվել են արտահերթ կարգով։
ԱԺ ղեկավարությունը երկու նախագիծն էլ չդրեց քննարկման՝ պատճառաբանելով, թե իրենց նախագիծն է արտահերթ քննարկվելու։ Ռ.Հակոբյանն ասաց, որ իշխանությունները նման խորամանկությունների են դիմում, որ իրենց նախագծերը չդնեն քննարկման։
