Մի քանի օր անց՝ հոկտեմբերի 26-ին, Ուկրաինայում կանցկացվեն Գերագույն Ռադայի արտահերթ ընտրությունները, ինչպես և հայտարարել էր Ուկրաինայի նախագահ Պյոտր Պորոշենկոն: Կենտրոնական ընտրական հանձնաժողովն օրերս ավարտել է թեկնածուների և կուսակցությունների գրանցումը, մեծամասնական և համամասնական ընտրացուցակների կազմումը: Ընտրություններին մասնակցելու դիմում է ներկայացրել 8 կուսակցություն՝ Պորոշենկոյի հիմնած «Պյոտր Պորոշենկոյի դաշինք»-ը, Օլեգ Լյաշկոյի «Արմատական կուսակցություն»-ը, Յուլյա Տիմոշենկոյի «Բատկիվշինա» կուսակցությունը, «Ազգային ճակատ»-ը՝ հիմնադրված Արսենի Յացենյուկի և Ալեքսանդր Տուրչինովի կողմից:
Սոցիոլոգիական հարցումների համաձայն՝ առաջատարը Պյոտր Պորոշենկոյի հիմնած դաշինքն է, որն ըստ նույն այդ հարցումների՝ կստանա քվեների 40%-ը: Համաուկրաինական ընտրություններին կմասնակցեն նաև հայ թեկնածուներ:
«Առաջին լրատվական»-ի հետ զրույցում Ուկրաինայի հայերի միության ներկայացուցիչ Դավիթ Մկրտչյանը տեղեկացրեց, որ ընտրություններին մասնակցում են նաև հայ թեկնածուներ՝ և համամասնական, և մեծամասնական ընտրակարգերով: Ըստ նրա՝ հետաքրքիր ընտրություններ են սպասվում, քանի որ առաջադրվել են նոր դեմքեր, տարբեր, և ընտրությունների ելքը ևս անկանխատեսելի է: Այս ընտրություններին առաջադրվել է նաև ազգությամբ հայ Արսեն Ավակովը «Ազգային ճակատ»-ից՝ 6-րդ համարի ներքո, ընդդիմադիր բլոկից՝ Վիլեն Շատվորյանը: Կան մի քանի հայ թեկնածուներ մեծամասնական ընտրակարգով առաջադրված՝ Տիգրան Խաչատրյանն «Ուժեղ Ուկրաինա»-ն է ներկայացնում, Ժիտոմիրի մարզում առաջադրվել է Սուրեն Գևորգյանը, 47-րդ ընտրատարածքում «Բատկիվշինան» է ներկայացնում Մարտիրոս Գրիգորյանը, 39-րդ ընտրատարածքում՝ Մհեր Կույումջյանը ներկայացնում է «Բատկիվշինա»-ն: Դավիթ Մկրտչյանի տեղեկություններով, կան թեկնածուներ, որոնք առաջադրվել են, սակայն նրանց թեկնածությունը չի հաստատվել ԿԸՀ-ի կողմից: Նա տեղեկացրեց, որ հայ համայնքները, հասարակությունը փորձում է հեռու մնալ քաղաքականությունից և չաջակցել որևէ թեկնածուի: Հայ համայնքի ներկայացուցչի խոսքով՝ հետաքրքիր ընտրություններ են սպասվում և սպասելիքները շատ են:
