«Ժողովուրդ» թերթի տեղեկություններով՝ ԲՀԿ նախագահ Գագիկ Ծառուկյանը Սամվել Կարապետյանի և Սամվել Ալեքսանյանի հետ հանգստանում է Դուբայում: Այս հանգիստը, եթե դատելու լինենք մամուլի հրապարակումներից, ըստ էության, արդեն ավանդական է, և նման հավաք-հանգստի մասին պարբերաբար հրապարակումներ լինում են: Սակայն վերջին հրապարակումը պետք է առանձնահատուկ համարել՝ հաշվի առնելով այն, որ Դուբայում միլիարդատեր Կարապետյանի և Հայաստանի մոնոպոլիստ օլիգարխ Սամվել Ալեքսանյանի հետ հանգստացող Գագիկ Ծառուկյանը այսօր ունի լիովին այլ կարգավիճակ՝ հոկտեմբերի 10-ից սկսած: Նա նոր ժողովրդական շարժման առաջնորդներից է, իսկ շարժման մասին նրա իսկ ներկայությամբ հռչակել է ՀԱԿ-ի նախագահ Լևոն Տեր-Պետրոսյանը: Ավելին ասենք, որ Գագիկ Ծառուկյանը, ըստ էության, հենց առաջնորդն է, քանի որ ոչ մի կասկած լինել չի կարող, որ այդ շարժման բազմամարդությունն ու այսպես ասած ֆունկցիոնալությունը ապահովվում է Գագիկ Ծառուկյանի խարիզմայի և նյութական աջակցության արդյունքում: Եվ ուրեմն շատ հետաքրքիր իրավիճակ է ստացվում. ժողովրդական շարժման առաջնորդ, որը և նրա կուսակիցները հանրահավաքների ընթացքում ահազանգում են, զանգ են խփում երկրի աղետալի վիճակի, կործանվող տնտեսության և արտագաղթի մասին, բայց հանգստանում է Դուբայի թանկարժեք հյուրանոցներում:
Խնդիրն այն է, որ Հայաստանի նման տոտալիտար կամ ավտորիտար երկրում, որտեղ խոսվում է իշխանության բռնազավթման և ամեն գնով վերարտադրության մասին, ժողովրդական շարժման առաջնորդները՝ իրական ժողովրդական շարժման, երևի թե կարող են միայն մի տեղ «հանգստանալ»՝ բանտում: Սակայն, երևի հենց այստեղ է նոր շարժման առանձնահատկությունը, և սրանով է, որ նոր շարժումը տարբերվելու է նախորդ ժողովրդական շարժումներից, սա է լինելու նոր շարժման հաջողության գրավականը:
Ինչպես «Խաթաբալադա» ներկայացման հերոսներից մեկը կասեր՝ ով է ասել, որ պոետները պետք է սոված լինեն: Իսկապես, ով է ասել, որ ռեժիմների դեմ պայքարող ժողովրդական շարժումների առաջնորդները պետք է զրկանքներ կրեն, ինտելեկտուալ լինեն և այլն: Կարևորը, որ լինեն վճարունակ և վարձեն ինտելեկտուալների, իսկ քանի որ առաջնորդների վրա է ընկնում ամենամեծ պատասխանատվությունը, նրանք պետք է լինեն առավելագույնս հարմարավետ պայմաններում և հանգստանան ինչքան հնարավոր է լավ, որովհետև ինչպես ասում են՝ ով ինչպես հանգստանում է, այդպես էլ աշխատում է, կամ ով ինչպես հանգստանում է, այդպես էլ իշխանափոխություն է անում: Ավելին՝ չբացառենք, որ իշխանություններին անակնկալի բերելու համար նոր ժողովրդական շարժումը շուրջօրյա հանրահավաքներ կսկսի ոչ թե Ազատության հրապարակում, այլ հենց Դուբայում, որտեղ «սառը ցնցուղը» ուղղակի անհասանելի կլինի՝ 50 աստիճան շոգին ո՞ր մի ցնցուղը սառը կմնա: