-Պարոն Գրիգորյան, Ձեր դասախոսությունները լսեցի Ամերիկյան համալսարանում։ Այստեղ տեսա՝ ինչ-որ առումով դժգոհություններ կան։ Ասում եք, որ միայն Սփյուռքը չպետք է դժգոհություններ ունենա, Հայաստանն էլ պետք է ներդրումներ անի: Ի՞նչ է այսօր առաջին հերթին ծառացած Հայաստանում կրթության առջև:
–Ես միայն նկատում էի: Ասացի, թե հասկանում էլ եմ ինչու. որովհետև Հայաստանը շատ խնդիրներ ունի այսօր բոլոր ասպարեզներում ՝ պատերազմական, գիտական, գյուղացիական և բոլոր ասպարեզներում: Շատ դրամ չկա, բայց կոչ էի անում, որ մեր բոլոր հարուստները ներդրումներ անեն մեր լավագույն հաստատությունների մեջ, որոնցից մեկը մեր ակադեմիան է, համալսարանը, գրադարանը: Մենք չենք կարող ուժեղ լինել առանց ուժեղ մշակույթի: Դա էր իմ պատգամը:
–Հիմա ի՞նչ վիճակ է:
–Ավելի լավ է, քան որ կար: 90-ականներին բոլորը գիրք էին վառում, ծառ էին վառում, որ ուտեին: Ամեն ինչ ծախում էինք, որ ապրեինք: Հիմա այդ վիճակի մեջ չենք, բարեբախտաբար: Բայց հիմա քանի որ ապագային ենք նայում, ապա պետք է ամեն ինչ անենք, որ ներդրումներ անենք բոլոր այն կենտրոններում, որոնք կարող են մեր ապագայի համար կարևոր լինել: Ըստ իս՝ կրթությունը մեր երկրի ամենամեծ ուժն է: Ինչ կարող ենք դնել կրթության մեջ՝ մեր ապագայի մեջ ենք դնում: Եթե երիտասարդությունը թուլանա, մեկնի, ապա երկիրը ապագայում անտեր կմնա:
–Հետևո՞ւմ եք ատագաղթի տեմպերին:
–Ամեն ինչին հետևում եմ: Դժբախտաբար, դա է, բայց տեսնում էլ եմ, թե քանի հոգի է վերադարձել և այստեղ գործ ստեղծել:
–Կրթության առումով ո՞ր ճանապարհը պետք է ընտրի Հայաստանը՝ ավելի եվրոպակա՞ն, ամերիկյա՞ն, թե՞ ռուսական:
–Մենք միշտ մեր ամբողջ պատմության մեջ երկու տեղն էլ պետք է լինենք: Մեր հարևանների լեզուն պետք է իմանանք, ռուսերեն լեզուն և գրականությունը պետք է իմանանք և եվրոպականը: Մենք երբեք չենք ընտրել մեկը մյուսի դեմ:
–Դուք նշում եք, որ կրթության, գիտության առումով մենք ունենք առաջընթաց:
–Բոլոր տեղերում էլ պետք է ներդնենք: Ով ուզում է ներդրում անել, նրա հետ էլ պետք է քայլենք, նրա հետ պետք է մոտ լինենք: Գերմանիան է ուզում օգնել՝ լավ, Ֆրանսիան՝ լավ, մենք բոլորից էլ ուզում ենք ընդունել այն, ինչ մեզ տալիս են:
–Ո՞րն է ձեր հաջողության գրավականը:
–Հավատք, զանազան արժեքներ և այն սկզբունքները, որոնցով առաջնորդվել եմ: