Չեչնիայի ղեկավար Ռամզան Կադիրովը հանդես է եկել համացանցն անջատելու օգտին, որպեսզի ոչ ոք չկարողանա լսել վահաբիթների քարոզները՝ հայտնում է INTERFAX-ը: Նրա խոսքով՝ «դա մեծ մինուս է քաղաքական, տնտեսական և սոցիալական պլանով, բայց մենք կդադարեինք սպանել իրար»:
Կադիրովը նաև ԴԱԻՇ-ին («Իրաքի և Շամի իսլամական պետություն») անվանում է «շայթանների խումբ»: Նա խոստանում է ոչնչացնել յուրաքանչյուրին, ով կգնա պետությունից՝ կռվելու ԴԱԻՇ-ի կողմից, և կողմ է համացանցն անջատելուն, որը դժվարացնում է երիտասարդության ճիշտ դաստիարակությունը:
«Նախկինում մեզ համար հեշտ էր աշխատել, երբ մարդը քարոզ էր կարդում, իսկ հիմա ամենուր համացանց կա, և երիտասարդությունը սիրում է քարոզներ լսել այնտեղից: Մի ժամանակ ես երազում էի, որ մեր հանրապետությունում համացանց լիներ, բայց հիմա կողմ եմ, որ այն անջատեն»,- հայտարարել է Կադիրովը:
«Յուրաքանչյուրի տանը համացանց կա: Ամեն մեկը կարող է վերցնել ու որևէ վահաբիթի քարոզ լսել: Նույնիսկ իմ տանն իմ երեխան ևս կարող է պատահմամբ որևէ քարոզ լսել: Ուստի մեր իմամներն աշխատում են նաև սոցցանցերում»,- նշել է Կադիրովը:
Նրա խոսքով՝ «ԴԱԻՇ-ը շայթանների խումբ է, որոնց նպատակն է ավելի շատ փող աշխատել: Նրանք կատարում են Արևմուտքի և Եվրոպայի հանձնարարությունները և նպատակաուղղված զբաղվում մուսուլմանների սպանությամբ: Նրանց պետք է ոչնչացնել՝ որտեղ էլ լինեն: Չեչնիայի Հանրապետությունում մենք նրանց բոլորին ոչնչացրել ենք»: