6 տարվա ազատազրկման դատապարտված Շանթ Հարությունյանի հայրը՝ Լոս Անջելեսում բնակվող Շահեն Հարությունյանը, վրդովված է դատավճռից և այն համարում է քաղաքական հետապնդում իր ընտանիքի նկատմամբ:
«Առաջին լրատվական»-ի հետ զրույցում Շահեն Հարությունյանն ասաց, որ դատարանը դաժան մոտեցում է ցուցաբերել իր որդու և թոռնիկի նկատմամբ և նման կերպ փորձ է արվում զսպել նաև մնացած ընդվզող քաղաքացիներին․ «Մեր ընտանիքի նկատմամբ հետապնդումները միշտ էլ եղել են, բայց հույս ունեմ, որ Հայաստանում իշխանափոխություն կլինի, դրան են նպաստում և արտաքին, և ներքին զարգացումները»,- ասաց Հարությունյանը:
Մեր զրուցակիցն ավելացրեց, որ պատրաստվում է նոր նամակներ հղել միջազգային կազմակերպություններին․ «Հիմա այդ ամենն ավելի խիստ ձևով է արվելու, ինտենսիվ ձևով շարունակելու եմ պայքարը»:
Շահեն Հարությունյանի դիտարկմամբ՝ այս իշխանությունները շուտով հեռանալու են: Մեր այն հարցին, թե արդյոք նոր իշխանությունները ազատ կարձակեն Շահեն Հարությունյանին՝ հաշվի առնելով, որ շատ քիչ ուժեր են նրան քաղբանտարկյալ հռչակել, Հարությունյանն ասաց․ «Մենք կաշխատենք, որ բոլոր մեթոդներով նրան քաղբանտարկյալ հռչակեն, ես կոնգրեսականներին կդիմեմ, սենատորներին և նրան անպայման քաղբանտրակյալ կհռչակեն»:
Շանթ Հարությունյանի հայրը դժգոհ է նաև Հայաստանի ընդդիմության և հասարակության աջակցությունից․ «Բավարար չէի համարի, չեղավ լուրջ միջոցառում, լուրջ միջոցներ չձեռնարկվեցին, փոքրիկ խմբեր փողոց դուրս եկան, բայց դա քիչ էր: Ընդհանրապես, ժողովուրդն անտարբեր է, դա հայ ժողովրդի ընդհանուր նկարագիրն է»: