«Առաջին լրատվական»-ի զրուցակիցն է ԱԺ ՀՀԿ խմբակցության պատգամավոր Կարինե Աճեմյանը:
–Տիկին Աճեմյան, ոչ իշխանական ուժերը հոկտեմբերի 10-ին հանրահավաք անցկացրին: Ճիշտ է, հիմնական խոսքը գալիք հանրահավաքին է ասվելու, այդուհանդերձ, հետաքրքիր է՝ իշխանությունները մտահոգվելու առիթ ունե՞ն՝ հաշվի առնելով նաև այն զանգվածը, որ հավաքվել էր Ազատության հրապարակում:
–Ես պետք է ասեմ, որ այդ զանգվածը նաև ձայներ ունի Ազգային ժողովում, այսինքն՝ դա որոշակի քաղաքական ուժի ետևում կանգնած զանգված է, չէի ուզենա ասել զանգված՝ մարդիկ են, ովքեր այսօր ունեն որոշակի բողոք: Գիտեք ինչ՝ պարբերաբար մեր երկրում ցույցեր տեղի ունեցել են, սա էլ մի ձև է՝ բողոքը հայտնելու, տեսակետներըարտահայտելու:Մենք որևէ խնդիր չենք տեսնում, իրենք ինչ-որ ծրագրեր ունեն, որոնք տանում են, բայց որոնք դեռևս մշուշոտ են:
–Երկու ուժեր՝ Հայ ազգային կոնգրեսն ու «Ժառանգություն»-ը, ձգտում են արտահերթ զարգացումների, նման հնարավորություն տեսնո՞ւմ եք:
–Բոլորովին, մենք ի վերջո մեծամասնություն ենք:Երբ մենք այդ մասին խոսում ենք, իրենց մոտ զայրույթ է առաջանում, բայց ինչպես իրենց մոտ կա ընտրողների բանակ, այնպես էլ մենք մեր ընտրողներն ունենք: Մեր թեկնածուներն ակտիվորեն մասնակցում են ՏԻՄ ընտրություններին և ընտրվում,այսինքն՝ մենք ձեռքներս ծալած չենք նստում: Հիմա տեղի են ունենալու բյուջեի քննարկումներ, պետք է քննարկենք այն պայմանագիրը, որը մենք կնքեցինք Եվրասիական տնտեսական միության հետ: Մենք անելիքներ ունենք, դրանք շատ են, պետք է ակտիվորեն աշխատենք:
–Այսինքն՝ հրապարակում հավաքված զանգվածը երկրում կրիտիկական վիճակ չի՞ կարող առաջացնել:
–Ես կուզենայի, որ սադրանքներ չլինեին, որ այդ ցույցերն ավելի խաղաղ ընթացք ունենային, և եթե իրենք ինչ-որ ուղղությամբ գնում են՝ ավելի հստակեցնեն իրենց նպատակներն ու անելիքները: Բոլորովին չեմ կարծում, որ որևէ մտահոգության պատճառ կա:
–Իշխող կուսակցությունը պատրաստվո՞ւմ է զիջումների գնալ:
–Եթե դուք նկատի ունեք իշխանափոխությունը՝ոչ: Իհարկե, մենք էլ շատ ցանկանում ենք, որ այնպիսի բյուջե ունենանք, որ տնտեսական աճ գրանցենք, և կարծում եմ՝ մեր կառավարությունն ամեն ինչ անում է, բայց մենք պետք է կարողանանք նաև օգնել, ոչ թե խանգարել: Ընդհանուր առմամբ՝ ոչ, այն արմատական դժգոհությունները, որ հայտնվում են, մենք տարիներ շարունակ նույն քաղաքական գործիչներից լսում ենք: Պարզապես մենք մեր գործն ենք անում, իրենք՝ իրենց:
Հարցազրույցն ամբողջությամբ՝ մեր տեսանյութում:
