Արդեն երկրորդ քառօրյան է, որ Ազգային ժողովում քննարկվում է Մարդու իրավունքների պաշտպանի 2013 թ. տարեկան զեկույցը: Եվ այդ քննարկումը աչքի ընկավ այն հանգամանքով, որ ՄԻ պաշտպան Կարեն Անդրեասյանին ու նրա զեկույցը քննադատեցին իշխող հանրապետականները, ովքեր երեք տարի առաջ նրան առաջարկել և ընտրել էին այդ պաշտոնում: Եվ հակառակը, նրան պաշտպանեցին ու նրա զեկույցի հետ համաձայնեցին ոչ իշխանական պատգամավորները: Ամեն դեպքում, ՄԻ պաշտպանի զեկույցի հետ ինչո՞ւ համաձայն չեն հանրապետականները:
«Զեկույցի հետ համաձայն լինել-չլինելու խնդիր չկա: Զեկույցի վերաբերյալ մեր գործընկերների քննադատությունն ընդամենը վերաբերում էր այն հարցին, որ մենք դիտարկում ենք նաև այս խնդիրները, որոնք ՄԻ պաշտպանը պարտավոր էր ներկայացնել մեր քննարկմանը: Ես իմ ելույթում ասացի՝ արդյոք միայն թվային արտացոլումը չէ՞, և պետք է նաև որակական ցուցանիշներ նշել այն դեպքում, երբ հայտարարվում էր, թե 363 գործերի դեպքում ընդամենը 12 գործի է ընթացք տրվել: Արդյոք դրանց հիմքե՞րն են բացակայել, արդյոք հանցակազմի բացակայության պարագայում չէ՞, որ գործերին հետագա ընթացք չի տրվել»,- «Առաջին լրատվական»-ի հետ զրույցում ասաց Կ. Անդրեասյանին քննադատողներից մեկը՝ ԱԺ պետաիրավական հարցերի մշտական հանձնաժողովի հանրապետական նախագահ Հովհաննես Սահակյանը:
ՀՀԿ-ականները Կ. Անդրեասյանին քննադատեցի հատկապես այն պատճառով, որ նա իր ելույթում ու զեկույցում քննադատաբար էր մոտեցել գլխավոր դատախազության ու պատգամավորների աշխատանքին: Այս դեպքում էլ ՄԻ պաշտպանին քննադատելու պատճառը գուցե գլխավոր դատախազ Գևորգ Կոստանյանն է, որին հանրապետականները, հավանաբար, ավելի շատ են ընդունում, և որը Հ. Սահակյանի համակուրսեցին է: Վերջինս հիշեցրեց, որ իր համակուրսեցին է նաև Կ. Անդրեասյանը և իր խոսքում լրագրողներին մեղադրեց նման «միտումնավոր շեղում» կատարելու համար:
Իսկ ՀՀԿ-ական պատգամավորն ինչպե՞ս է մեկնաբանում հանգամանքը, որ ոչ իշխանական պատգամավորներն ավելի շատ են համամիտ Կ. Անդրեասյանի զեկույցի դիտարկումների հետ, քան իրենք: «Ես անչափ ուրախ եմ, որ ՄԻ պաշտպանի անձի հետ կապված մեր դիրքորոշումը՝ երբ մենք, որպես առաջադրող մարմին, նրան բերեցինք և սատարեցինք, ընդդիմախոսները արդեն իսկ դրական են գնահատում նրա աշխատանքը: Ուրեմն, այս երկու-երեք տարիների ընթացքում նա կայացել է»,- պատասխանեց Հ. Սահակյանը: