Ազգային ժողովի փոխնախագահ Էդուարդ Շարմազանովը, ՀՀԿ խմբակցության պատգամավոր Կարինե Աճեմյանը և «Օրինաց երկիր» խմբակցության ղեկավար Հեղինե Բիշարյանը հոկտեմբերի 12-ին Շվեյցարիայի Ժնև քաղաքում մասնակցել են միջխորդարանական միության 131-րդ վեհաժողովին:
Այսօր Ազգային ժողովում լրագրողների հետ հանդիպման ընթացքում Էդուարդ Շարմազանավն ասաց, որ սա առաջին այցն էր Շվեյցարիա՝ Եվրասիական տնտեսական միությանն անդամագրվելուց հետո: Նա ընդգծեց, որ Հայաստանի Ազգային ժողովի պատվիրակությունը, բացի առաջարկություններ անելուց, երկկողմ հանդիպումներ է ունեցել Շվեյցարիայի խորհրդարանի փոխնախագահի, Կիպրոսի ԱԺ նախկին նախագահի հետ, և բավականին ընդգրկուն օրակարգ են ունեցել:
«Քննարկել ենք նաև Հայաստանին և ԵՄ-ի համագործակցությունը: Մեր եվրոպացի գործընկերները հարգանքով են վերաբերվում մեր որոշմանը և տեսնում են հարաբերությունների զարգացման հնարավորություն:
Անդրադարձ է կատարվել հայ-թուրքական հարաբերություններին, և մենք նշել ենք, որ անհասկանալի և անթույլատրելի է, երբ մի պետություն, որը ցանկանում է մուտք գործել Եվրամիություն, ոչ թե ժողովրդավարական արժեքներ է դավանում, այլ փակ սահմաններ է պահում»:
Շարմազանովն ընդգծեց նաև, որ անդրադարձ է արվել Ղարաբաղյան հակամարտության կարգավորմանը, և հայկական կողմն ընդգծել է, որ անթույլատրելի է խնդրի ռազմական լուծումը:
Պատվիրակության կազմում ընդգրկված ՀՀԿ խմբակցության պատգամավոր Կարինե Աճեմյանն իր հերթին նշեց, որ միջխորհդարանական միությունը շատ կարևոր ձևաչափ է. «Սա այն կառույցն է, որտեղ համարյա բոլոր խորհրդարանները լինում են. այս անգամ 142 երկիր էր ներկայացված: Մենք քննարկեցինք տվյալ ժամանակահատվածի հրատապ հարցերը: Մեր պատվիրակության այցը հատկանշանական էր նրանով, որ ընտրեցինք միջխորհրդարանական միության նախագահ»:
Կարինե Աճեմյանն ավելացրեց, որ ինքն ընտրվել է երկրների խաղաղության և ազգային անվտանգության բյուրոյի անդամ:
ՕԵԿ պատգամավոր Հեղինե Բիշարյանն էլ նշեց, որ ինքն ընտրվել է կանանց կոմիտեի միջազգային միության նախագահ: «Քննարկել ենք հիմնականում էբոլայի համաճարակը. դա առաջին հրատապ հարցը դարձավ: Արծարծվել են նաև «Կինը և ընտանիքը», «Կինը և քաղաքականությունը»,«Կինը և սոցիալական խնդիրները» թեմաները:
