ՀՀ կառավարությունը պարզել է, որ չնայած Հայաստանում ծնելիության կրճատմանը՝ վերջին տարիներին տրամադրվող հղիության նպաստը մոտ 4 անգամ աճել է, ինչը, ըստ կառավարության ներկայացուցիչների, պետության հաշվին գումարներ աշխատելու արդյունք է. որոշ գործատուներ վերջին ամիսներին հղիին բարձր աշխատավարձ են գրում, քանի որ դրա դիմաց փոխհատուցում է պետությունը: Եվ այս տեմպերով շարունակվելու դեպքում 2020-21 թվականներին պետբյուջեի համար այդ բեռը կազմելու է 25-30 միլիարդ դրամ:
Ուշագրավն այն է, որ որպես խնդրի լուծման և մեքենայությունների ռիսկերը նվազեցնելու տարբերակ՝ կառավարությունն առաջարկում է կրճատել աշխատող բոլոր հղիների՝ ներկայումս 100%-ի չափով տրամադրվող նպաստը, այն դարձնել 80%, գումար տնտեսել և չաշխատող հղիներին տրամադրել նպաստ: Ընդունվելու դեպքում աշխատող հղիների նպաստի փոխհատուցումը կկրճատվի 2015 թվականից, իսկ չաշխատող հղիների մայրության նպաստը կսկսվի տրամադրվել 2016 թվականից: Աշխատող հղիները, բնականաբար դժգոհ են, որ պետությունը հենց իրենց հաշվին է ուզում օգնել չաշխատող հղիներին և պատրաստվում են առաջիկայում բողոքի ակցիաներ անել:
Չաշխատող կնոջը տրվող նպաստը 2016 թվականին, առանց հարկերի, կկազմի 275 հազար դրամ: Այսօր հղիության և ծննդաբերության նպաստ է տրվում 13 հազար աշխատող կնոջ, իսկ առաջարկվող փոփոխությունն ընդունելու դեպքում հղիության և ծննդաբերության նպաստ կստանա տարեկան ևս 30 հազար կին:
Աշխատանքի և սոցիալական հարցերի նախարարությունն ու Կենսաթոշակային հիմնադրամի իրազեկման կենտրոնը Ծաղկաձորում լրագրողների համար սեմինար էին կազմակերպել, որի ընթացքում «Առաջին լրատվական»-ը զրուցեց աշխատանքի և սոցիալական հարցերի նախարար Արտեմ Ասատրյանի հետ: