Արմավիրի մարզի ընդհանուր իրավասության դատարանում Արթուր Ադամյանի նախագահությամբ ընթանում է Հրաչիկ Վարդանյանի, անչափահաս Վահե Խ.-ի և Գուրգեն Զաքարյանի գործի դատական քննությունը:
Ըստ մեղադրանքի՝ 26-ամյա Հրաչիկ Վարդանյանը 2014 թվականի մայիսի 18-ին, գիշերվա ժամը 4-ի սահմաններում, իր եղբորորդի, անչափահաս՝ 1997 թվականի սեպտեմբերի 1-ին ծնված, հանցագործության պահին դեռ 16-ամյա Վահե Խ.-ի հետ նախնական համաձայնության է եկել, ու Մեծամոր քաղաքից դեպի Ակնալիճ գյուղ տանող ճանապարհի 1-ին կիլոմետրի հատվածում նրանք հարձակվել ենԱրմավիր քաղաքում ժամանակավորապես բնակվող, Բոսնիա և Հերցեգովինայի Հանրապետության քաղաքացի Ասիմ Շոգոլի վրա:
Շոգոլի կյանքի և առողջության համար վտանգավոր բռնություն գործադրելով՝ հարձակվողները, ըստ մեղադրանքի, հափշտակել են 40 հազար դրամ արժողությամբ «Նոկիա« հեռախոսը, 300 եվրո և 6 հազար դրամ՝ տուժող օտարերկրացուն պատճառելով ընդհանուրը՝ 216 հազար 208 դրամի գույքային վնաս:
Հրաչիկ Վարդանյանն ու իր անչափահաս եղբորորդին մեղադրվում են ավազակային հարձակման համար՝ ՀՀ քրեական օրենսգրքի 175 հոդվածի 2-րդ մասի 1-ին կետով:
Ամբաստանյալի աթոռին նստած երրորդ անձը՝ 37-ամյա Գուրգեն Զաքարյանը, մեղադրվում է ակնհայտ հանցավոր ճանապարհով ստացված գույք ձեռք բերելու համար:
Ըստ մեղադրանքի՝ տաքսու վարորդ Զաքարյանը, ականատես լինելով Շոգոլի վրա կատարված հարձակման ու տուժողից հափշտակության կատարմանը, իր համար ակնհայտորեն հափշտակված 6 հազար դրամից վերցրել է 3 հազար դրամը՝ որպես մատուցած տաքսի ծառայության վճար:
Այդ գումարի ձեռքբերումը, ըստ մեղադրանքի, նախապես խոստացված չի եղել: Նշված գումարով Զաքարյանը լիցքավորել է մեքենան: Նա մեղադրվում է ՀՀ քրեական օրենսգրքի 216 հոդվածի 1-ին մասով:
