«Առաջին լրատվական»-ի զրուցակիցն է ԳԱԱ երիտասարդ գիտնականների խորհրդի նախագահ, ՀՀ Նախագահի հովանու ներքո իրականացվող Երիտասարդ գիտնականների աջակցության ծրագրի ղեկավար մարմնի անդամ Գևորգ Վարդանյանը
-Վերջին մի քանի տարիներին երիտասարդ գիտնականները պարբերաբար բարձրաձայնում են գիտության ֆինանսավորման ավելացման խնդիրը, սակայն սայլն այդպես էլ տեղից չի շարժվում: Երիտասարդ գիտնականների աջակցության ծրագրի ղեկավար մարմնի անդամ եք, արդյոք նկատո՞ւմ եք վերջին ատյանում մտահոգություն ֆինանսավորման վերաբերյալ:
-Ցավոտ հարց եք բարձրացնում, քանի որ գիտենք՝ այսօր գիտության ֆինանսավորումը բավականին ցածր է: Եթե ընդհանուր վիճակագրությունը դիտարկենք, օրինակ՝ Եվրոպայում և ԱՄՆ-ում, որպեսզի ունենանք գիտության աճ, ՀՆԱ-ի գոնե 1 տոկոսը պետք է գիտության ֆինանսավորմանը հատկացվի, բայց այսօր, ցավոք սրտի, մեզ մոտ գրեթե չորս անգամ պակաս է: Սակայն վերջին տարիներին ուշադրություն է դարձվում հենց երիտասարդ գիտնականներին, քանի որ իշխանությունները հասկանում են, որ այս երիտասարդ գիտնականներն են, որ պետք է ապագայում միջին սերունդ կազմեն, որպեսզի գիտությունն աստիճանաբար զարգանա: Այդ համատեքստում է նաև բնակարանաշինության ծրագիրը, որը նույնպես իրականացվում է նախագահի հովանու ներքո, նախագահի հովանու ներքո իրականացվող երիտասարդ գիտնականների աջակցության ծրագիրը: Սրանք քայլեր են, որոնք աստիճանաբար ինչ-որ ձևով պետք է խթանեն երիտասարդ գիտնականի գործունեությանը:
–Գիտնականը, որ ստանում է ամսական 70 հազար դրամ աշխատավարձ, արդյոք կարո՞ղ է օգտվել այս ծրագրից, նրան հասանելի՞ է արդյոք այդ բնակարանը:
-Այսօր երիտասարդ գիտնականներն ունեն բնակարանային խնդիր, երկրորդ՝ սոցիալական, աշխատավարձի խնդիր, որ կարողանան ընտանիք կազմել և այլն: Բոլորս էլ հասկանում ենք, որ այսօր երիտասարդին դժվար է ձեռք բերել բնակարան, բայց սա մեկ քայլ է, որ երիտասարդ գիտնականը կարողանում է մատչելի գնով բնակարան ձեռք բերել: Այլ հարց է՝ նա կարողանո՞ւմ է այդ աշխատավարձով բնակարանի գումարը մուծել, թե՞ ոչ: Բոլորս էլ հասկանում ենք, որ պետք է օգնեն ծնողները, բարեկամները, բայց նա կարողանում է մատչելի գնով ձեռք բերել բնակարան նորակառույց շենքում:
–Երիտասարդ գիտնականների արտագաղթը մեծ է: Կա՞ արդյոք վիճակագրություն՝ քանի՞ տոկոսն է վերջին տարիներին հեռացել Հայաստանից:
-Վիճակագրություն չեմ կարող ասել, քանի որչգիտեմ թվերը, սակայն 90-ականներին հարգելի պատճառներով բավականին շատ գիտնականներ՝ 25-30 տարեկան, գնացին արտերկիր՝ մի մասը գիտությամբ զբաղվելու, մյուս մասը՝ այլ աշխատանքունենալու, և այսօր, ցավոք, մենք գիտնականների միջին սերնդի բաց ունենք: Այդ միջին սերնդի բացը պետք է երկու ճանապարհով լրացվի՝ կա՛մ վերադարձ, որն անհնար եմ համարում, կա՛մ երիտասարդ կադրերի շատացում, որ մի քանի տարի հետո կկազմեն միջին սերունդ:
Ավելին՝ տեսանյութում: