armlur.am-ը գրում է. «Հոկտեմբերի 13-ին Կոտայքի մարզի Առինջ համայնքում կրակոցների հետևանքով սպանված Լևոն Ավետիսյանը «Ինեկոբանկ» փակ բաժնետիրական ընկերության դրամարկղի ղեկավարն էր, իսկ ահա հրազենային վիրավորում ստացած նրա կինը՝ Նունե Ավետիսյանը, աշխատում է Խանջյան-Թումանյան փողոցների խաչմերուկի տարադրամի փոխանակման կետում: Եվ այսպես՝ նշված օրը՝ ժամը 20:05-ին, երկու անհայտ անձինք, որոնցից մեկը եղել է դիմակավորված, Կոտայքի մարզի Առինջ գյուղի Մհեր Մկրտչյան 2-րդ փողոցի թիվ 9-ը տան մոտ սպասել է ամուսիններ Նունե և Լևոն Ավետիսյաններին: Երբ Լևոն Ավետիսյանի BMW մակնիշի ավտոմեքենան մոտեցել է իր տան մուտքին, հանցագործներն ինքնաձիգով կրակել են մեքենայի ուղղությամբ: Արդյունքում՝ Լևոն Ավետիսյանը գլխի մասում ստացած հրազենային վնասվածքից հիվանդանոցում մահացել է, իսկ նրա կինը` 1963 թ. ծնված Նունեն, կրծքավանդակի ձախ կեսի հրազենային վնասվածք ախտորոշմամբ տեղափոխվել է Գրիգոր Լուսավորիչ հիվանդանոց, որտեղից ավելի ուշ նրան դուրս են գրել:
«Ժողովուրդ»-ը կատարվածի շուրջ նախ զրուցեց «Ինեկոբանկ» փակ բաժնետիրական ընկերության աշխատակազմի ղեկավարի տեղակալ Անատոլի Տիրոսյանի հետ: Ըստ մեր զրուցակցի, Լևոն Ավետիսյանը «Ինեկոբանկ» ՓԲԸ-ում աշխատում էր որպես դրամարկղի ղեկավար: «Հոյակապ արհեստավարժ մասնագետ էր: Մեր կարծիքով միջադեպը որևէ կապ չունի բանկի աշխատանքի հետ»:
Հարցին, թե մի՞գուցե հանցագործները մտածել են, որ բանկի դրամարկղի ղեկավարն իր մոտ շատ գումար կունենա և այդ պատճառով էլ հարձակում են գործել, Անատոլի Տիրոսյանը պատասխանեց. «Ցավոք սրտի մենք չենք կարող որևէ մեկնաբանություն անել հնարավոր հանցագործների մտածելակերպի մասին, սակայն թույլ տվեք ասել, որ ՀՀ բանկային օրենսդրության համաձայն՝ բանկի դրամական հանգույցներից արգելված է դուրս հանել որևէ գումար: Առնվազն անհեթեթություն է մտածել, որ մարդը, աշխատելով կանխիկ փողի հետ, այն կարող է բանկից դուրս հանել»:
Զրուցակցի խոսքով, Լևոն Ավետիսյանին գրեթե հանդիպել է ամեն օր. «Երբևէ չեմ լսել թշնամիների կամ խնդիրների մասին: Գիտեք, եթե մարդն ունի թշնամիներ կամ պարտքեր, դժվար թե մնա և բանկում աշխատի՝ որպես ղեկավար: Ցավոք, պետք է նշեմ, որ նրան դեպքի օրը չեմ տեսել»:
Մանրամասները՝ armlur.am-ում
