Պուտինը կատարում է իր խոստումն ու ընդլայնում ներկայությունը Հարավային Կովկասում: «Առաջին լրատվական»-ի հետ զրույցում այս մասին ասաց Ֆրանսիայի Ռազմավարական հետազոտությունների հիմնադրամի փորձագետ, քաղաքագետ Կայծ Մինասյանը՝ անդրադառնալով Ռուսաստանի ռազմական ներկայության ընդլայնմանը Հարավային Կովկասում:
Կայծ Մինասյանն ասաց, որ դրա նպատակը շատ պարզ է, ինչպես Պուտինն անցած տարի ասաց ՀՀ-ում, ՌԴ-ն ավելի մեծ ներկայություն պետք է ունենա Հարավային Կովկասում: Ուստի, միջազգայնագետի համոզմամբ, Պուտինն անում է այն, ինչ խոստացել է:
«Կարելի է մի քանի պատճառ ևս թվարկել: Միջին Արևելքում ստեղծված իրավիճակը լարված է, այդ լարվածության առաջին ճակատը Հարավային Կովկասն է, ուստի Ռուսաստանը հզորացնում է իր ներկայությունը Հարավային Կովկասում: Հստակ իմանալով, որ Թուրքիան, Ադրբեջանը բավական մեծ համագործակցության մեջ են բոլոր ոլորտներում` ՌԴ-ն հավասարակշռությունը պահելու համար ավելացնում է ներկայությունը Հայաստանում: Երրորդ պատճառը հետևյալն է. Հայաստանի անկախության ցուցիչը նաև բանակն է, և զորացնել բանակը նշանակում է`ռուսները ցանկանում են ցույց տալ, որ Հայաստանն իսկապես Ռուսաստանի համար ենթարկելի երկիր է: Մյուս կողմից` ռուսները ցույց են տալիս, որ եթե Ուկրաինայի հարցը բանակցությունների առարկա է, ապա Կովկասում կարող են անել իրենց ցանկացածը, նրանք դա անում են նաև ԼՂ հակամարտության պահպանման միջոցով, որն էլ իրականացնում են երկու հակամարտող կողմերում ռազմական ներկայության ընդլայնմամբ»,- մեկնաբանեց Կայծ Մինասյանը:
Անդրադառնալով Վրաստանին ուղղված սպառնալիքին՝ նա ասաց, որ այս ամենը Վրաստանի դեմ ևս ուղղված է: «Իմանալով, որ Վրաստանում ՆԱՏՕ-ի աջակցությամբ կենտրոն է բացվում` ռուսներն, իբրև պատասխան, իրենց ներկայությունն են մեծացնում այստեղ: Ռուսաստանը Հարավային Կովկասում միջազգային խաղ է տանում, իսկ Հայաստանն իմանալով, որ Ադրբեջանը մեծ կարողություն ունի` դեմ չէ, որ ռուսները ներկայություն մեծացնեն Հայաստանում»,- ասաց Կայծ Մինասյանը՝ հավելելով, որ այս ամենից տուժում է Հայաստանի անվտանգությունն ու անկախությունը, որովհետև Հայաստանը կամաց-կամաց դառնում է ՌԴ-ի ինքնավար մարզը, մի սուբյեկտը, ինչպիսին, օրինակ, Դաղստանն է:
«Ռուսները խաղ են տանում: Ինչ արդյունք կլինի, արդյոք Պուտինի քաղաքականությունը կհաջողի՝ չգիտենք: Ռուսները ցանկանում են ցույց տալ, որ Կովկասը իրենց է պատկանում և ոչ այլ ուժի»,- ասաց Մինասյանը:
Հիշեցնենք, որ The Guardian-ի հոդվածում ասվում է, որ Մոսկվան պատրաստվում է ընդլայնել իր ռազմաօդային բազաները Հայաստանում և Ղրղըզստանում, ինչպես նաև ծրագրում է կործանիչների համար Արևելյան Բելառուսում 2016թ. ավիաբազաներ կառուցել: Այս մասին ասել է Ռուսաստանի ռազմաօդային ուժերի գլխավոր հրամանատար Վիկտոր Բոնդարյովը:
Հայաստանը, Ղրղըզստանը և Բելառուսն անվտանգության ազատ դաշինքի անդամներ են, որը գլխավորում է Ռուսաստանը, և հայտնի է որպես Հավաքական անվտանգության մասին պայմանագրի կազմակերպություն: Այն արագացրեց ՀՕՊ միասնական համակարգի ստեղծման տեմպերը, քանի որ ուկրաինական ճգնաժամը նոր խթան է տվել Արևմուտքի ուժային բլոկի՝ ՆԱՏՕ-ի զարգացման համար՝ ասվում է հոդվածում:
Դեռ մինչ Ուկրաինայում հակամարտությունը՝ Ռուսաստանը, նախագահ Վլադիմիր Պուտինի ղեկավարությամբ, զգալի ջանքեր է գործադրել, որպեսզի վերականգնի իր պատմական ռազմական ներկայությունն Արևելյան Եվրոպայում, Կենտրոնական Ասիայում, Արկտիկայում և այլ երկրներում: Այժմ բանակցություններ են տարվում Վիետնամի, Կուբայի, Վենեսուելայի և Նիկարագուայի հետ ռուսական ռազմավարական ռմբակոծիչների համար բազաների կառուցման վերաբերյալ՝ գրում է թերթը:
