2001թ. նոյեմբերի 8-ին Հայաստանի Հանրապետությունը ստորագրել է «Բռնությամբ կատարված հանցագործությունների զոհերին փոխհատուցելու մասին եվրոպական կոնվենցիան», իսկ ՀՀ Սահմանադրական դատարանը 2003թ. օգոստոսի 20-ին որոշել է, որ այդ կոնվենցիայով «ամրագրված պարտավորությունները համապատասխանում են ՀՀ Սահմանադրությանը»: Նաև այս կոնվենցիան հիմք ընդունելով՝ ՀԱԿ խմբակցությունը Ազգային ժողով է ներկայացրել «Բռնությամբ կատարված հանցագործությունների զոհերին փոխհատուցելու մասին» օրենքի նախագիծը, որն այսօր քննարկվում էր Պետաիրավական հարցերով մշտական հանձնաժողովի նիստում:
Նախագիծը ենթադրում է, որ փոխհատուցում պետք է ստանան նաև 2008թ. մարտի 1-ի զոհերի հարազատները: Ահա այս հանգամանքը հավանաբար դուր չէր գալիս խորհրդարանական մեծամասնությանը՝ Հանրապետական խմբակցությանը, ովքեր էլ դեմ էին արտահայտվում ՀԱԿ-ի այդ օրինագծին: Իսկ Հանրապետական խմբակցության անդամ, ՄԻԱԿ-ի գլխավոր քարտուղար Լևոն Մարտիրոսյանը հարց բարձրացրեց, թե եթե հարցը Մարտի 1-ի զոհերի հարազատներին փոխհատուցում տալն է, ապա կարելի է կոնկրետ այդ դեպքի հետ կապված առանձին նախաձեռնություն անել: Նրա խոսքով՝ հայտնի չէ, թե քանի դեպքի և որքան փոխհատուցման մասին կարող է խոսք լինել: «Ինչ վերաբերում է Մարտի 1-ին, բռնությամբ կատարված հանցագործությունների զոհերի մասին է խոսքը և գործնականում հնարավոր է հաշվարկել»,- ասաց նա:
Հիշեցնենք, որ 2008 թվականից մինչև այսօր նման բազմաթիվ առաջարկություններ են եղել, որոնք տարբեր պատճառաբանություններով չեն ընդունվել իշխանությունների կողմից: Իսկ Լ.Մարտիրոսյանը «Առաջին լրատվական»,-ի հետ զրույցում ասաց, թե ինքը ցանկանում է, որ 10 զոհերի հարազատները փոխհատուցում ստանան, և նա հնարավոր համարեց, որ ինքը ներկայացնի նման նախագիծ: Իսկ մինչ այսօրվա քննարկումը Լ.Մարտիրոսյանը տեղյակ չէր, որ Մարտի 1-ի դեպքերի արդյունքում գույքային վնաս կրած սուբյեկտները բավականին ծանրակշիռ՝ «Երևան» հիմնադրամով ավելի քան 70 մլն դրամի փոխհատուցում են ստացել: Խոսքը վերաբերում է, օրինակ, Մաշտոցի պողոտայում Սամվել Ալեքսանյանի «Երևան սիթի» խանութին: