«Առաջին լրատվական»-ը զրուցել է «Ժառանգություն» կուսակցության առաջնորդ Րաֆֆի Հովհաննիսյանի հետ:
– Հոկտեմբերի 10-ին Դուք հստակ Ձեր դիրքորոշումը հայտնեցիք Հայաստանի ԵՏՄ-ի անդամակցության կապակցությամբ, տեսաք նաև այդտեղ Հայաստանի սուվերենության, ինքնուրույնության հետ կապված վտանգներ: Փաստորեն, Ձեր այս դիրքորոշումը ոչ միայն իշխանության, այլև քառյակի դիրքորոշումից է տարբերվում: Ինչպե՞ս է լինում համատեղումը:
–Մեր տեսակետը շատ հստակ է, որ այդ միավորմանը միանալը չի բխում Հայաստանի շահերից, հակասահմանադրական է, և փաստացի գործող պարոն Սարգսյանի ստորագրությունն այնտեղ առոչինչ է: Ամեն մարդ ունի իր տեսակետը: Գոնե խորհրդարանական երեքի կամ չորսի համագործակցության նիստերում այս հարցը չի քննարկվել, բայց ես և «Ժառանգությունը» անձամբ կքննարկենք՝ ներկայացնելու այդ տեսակետը, որովհետև այս իշխանությունը ոչ լեգիտիմ է և ոչ լեգիտիմ է ոչ միայն գողացված ընտրությունների բերմամբ, այլև այն քայլերով, որոնք այն կատարել է արձանագրություններով՝ հայ-թուրքական հարաբերություններում, որն ուղղակի ազգային շահի դեմ է, իսկ այս մեկը ուղղակի հակասահմանադրական է, երբ նժարի վրա դրվում և զիջվում է Հայաստանի անկախությունը և ինքնիշխանությունը: Դա մեր տեսակետն է, և կարծում եմ, որ հայ ժողովրդի մեծամասնությունը կիսում է այդ տեսակետը: Հուսամ, որ մեր գործընկերները նույնպես շատ խոր կվերլուծեն այս հարցը և կվերանայեն իրենց մոտեցումը:
-Նկատի ունեք, որ Եռյակում հնարավոր է՝ այս հարցի վերաբերյալ դիրքորոշո՞ւմ փոխվի: Մենք տեսանք, որ կարծես թե Ձեզ էլ թույլ չտվեցին մինչև վերջ խոսքն ավարտել, և ընդհանրապես, հարթակում ինչպե՞ս էիք պատկերացնում Ձեզ և Տեր-Պետրոսյանին, երբ մի քանի տարի առաջ նույն Տեր-Պետրոսյանը, երբ Դուք ծոմի մեջ էիք, չմոտեցավ Ձեզ հանրահավաքի ժամանակ:
–25 տարի է՝ ես արդեն Հայաստանում եմ, և երևի մի գործիչ կամ կուսակցություն չի լինի, որ ինձ չի կպել, չի հարվածել, թթու խոսք չի ասել իմ հասցեին՝ լինի ընդդիմադիր, թե իշխանական: Դա ինձ չի հուզում: Ինձ հուզում է այն, որ հայ ժողովուրդն ունի ակնկալիք, այդ ակնկալիքը նաև քաղաքական և քաղաքացիական ուժերի միավորման միջոցով է, և դրա համար հենց այդ օրը ես ասացի, որ անհրաժեշտ է՝ թե՛ քաղաքական, թե՛ քաղաքացիական ուժերն ունենան հստակ նպատակ, ծրագրային քարտեզ և առաջիկա քայլերի հստակ պատկերացում: Ես ասել եմ բազմաթիվ անգամներ. նպատակն ինձ համար ծանոթ է, հարազատ է, այնտեղ կան տարբեր տրամադրություններով զինված մարդիկ, և կարևոր է, որ այդ ժողովուրդն ունենա հստակ ուղղություն և հերթական հիասթափությունը չապրի: Ներկա դրությամբ այդ համագործակցությունը խորհրդարանական համագործակցություն է երեքի կամ չորսի միջև,- ժամանակը ցույց կտա թիվը,- և եթե սա պետք է ունենա համապետական նշանակություն, ապա անհրաժեշտ է, որ մինչև հոկտեմբերի 24-ը հստակ և միակարծիք ժողովուրդը ստանա այդ առաջարկը, որ գալիս է հարթակից:
–Ո՞ր դեպքում «Ժառանգությունը» դուրս կգա եռյակից:
–Ես չեմ կարծում, որ որևէ տեղից դուրս գալու խնդիրը դրված է: Խորհրդարանական այդ համագործակցությունը կշարունակվի, հարցն այն է, թե այդ համագործակցությունը կմնա խորհրդարանի պատերից նե՞րս, թե՞ ընդարձակ հրապարակային կդառնա: