Արդարադատության նախարար Հովհաննես Մանուկյանը լրագրողների հետ զրույցում այդպես էլ չցանկացավ պատասխանել այն հարցին, թե ցանկանո՞ւմ է, որ 2008թ. մարտի 1-ի իրադարձությունների 10 զոհերի հարազատները փոխհատուցում ստանան: Այսօր Ազգային ժողովում՝ պետաիրավական հարցերով մշտական հանձնաժողովում, քննարկվում էր ՀԱԿ խմբակցության ներկայացրած «Բռնությամբ կատարված հանցագործությունների զոհերին փոխհատուցումներ կատարելու մասին» նախագիծը, որը ենթադրում էր փոխհատուցում տրամադրել նաև մարտի 1-ի զոհերի հարազատներին: Իսկ հարցին, թե համաձա՞յն է այսօր հնչած հայտարարություններին, որ Մարտի 1-ի իրադարձությունները դեռ բացահայտված չեն, Հ.Մանուկյանն այսպես պատասխանեց. «Դա քաղաքական հայտարարություն է, պառլամենտը քաղաքական հարթակ է, ցանկացած բնույթի հայտարարություններ կարող են հնչել: Բնականաբար, ես ինքս համաձայն չեմ այդ հայտարարության հետ»:
Ի վերջո, արդարադատության նախարարը համաձա՞յն է, որ 10 զոհերի հարազատները փոխհատուցում ստանան: «Դա քննարկված հարցի հետ կապ չունի: Այս օրենքը կապ չունի Մարտի 1-ի հետ, այս օրենքը կոնկրետ անուն ունի՝ բռնությամբ կատարված հանցագործությունների զոհերի փոխհատուցման մասին: Իսկ Մարտի 1-ը դրա քաղաքական մեկնաբանությունն է»,- ասաց Հ.Մանուկյանը՝ այդպես էլ չպատասխանելով բուն հարցին:
