Փոխոստիկանապետ Հունան Պողոսյանը նորմալ է համարում ոստիկանության համակարգում իրականացվող կադրային քաղաքականությունը: «Ոչ մի կադրային փոփոխություն ինքնանպատակ չէ: Սա մշտական, նորմալ գործընթաց է, որը միտված է միմիայն համակարգի աշխատանքների բարելավմանը»,- «Առաջին լրատվական»-ի հետ զրույցում ասաց Հունան Պողոսյանը:
Նրա խոսքով՝ եթե իրենք զգում են, որ ինչ-որ տեղ ինչ-որ պաշտոնյա, ինչ-որ աշխատակից չի արդարացնում իրեն, նրան նախ՝ ժամանակ է տրվում, որից հետո կատարվում է համապատասխան նոր նշանակում կամ փոխատեղում: «Այնպես որ՝ շատ ժամանակ աննպատակ ոչինչ չի արվում»,- հավելեց Պողոսյանը:
Մեր դիտարկմանը, թե շատ դեպքերում նրանց անգամ աշխատելու ժամանակ չի տրվում, որպեսզի հասկացվի՝ որքանով է արդյունավետ նրանց աշխատանքը, փոխոստիկանապետը նկատեց. «Մենք ձեր նշած մեկ-երկու դեպք ունենք, որոնք կատարել ենք մեզ հասկանալի պատճառներով: Դրանք են՝ համապատասխան գիտելիքներ չունենալը, վրիպումներ թույլ տալը, անձնակազմի հետ աշխատել չկարողանալը: Այս ամենը հասկանալու համար շատ կարճ ժամանակ է պետք: Մենք չենք պատրաստվում տարիներով թողնել մարդուն պաշտոնին՝ հասկանալու համար՝ նա կարո՞ղ է աշխատել, թե՞ ոչ»:
Պողսյանի խոսքով՝ ոստիկանությունում իրականացվող նման կադրային քաղաքականությունը համակարգում դժգոհության պատճառ չի դառնում:
Հունան Պողոսյանը նշեց, որ համակարգում նաև բավարար քայլեր են տարվում բարձրաստիճան ոստիկանների կողմից հովանավորչության դեպքերի բացառման համար: «Մենք բոլորից շատ ենք շահագրգռված քննարկումների արդյունքում ազատվելու վատերից»,- ասաց Պողոսյանը:
Ինչ վերաբերում է Երևանի ոստիկանապետի տեղակալ Վալերի Օսիպյանի եղբորորդու դեպքին, ապա փոխոստիկանապետի խոսքով՝ ոստիկանության մարմինները ձեռնարկում են համապատասխան միջոցներ նրան հայտնաբերելու ուղղությամբ: «Մենք ամեն օր Օսիպյանին ստիպում ու պարտադրում ենք գտնել, պարզել, համոզել եղբորորդուն»:
Փոխոստիկանապետից հետաքրքրվեցինք նաև՝ եթե հոկտեմբերի 24-ին ոչ իշխանական ուժերը գնան չնախատեսված գործողությունների՝ հնարավո՞ր է ոստիկանությունը կրկնի 2008-ի Մարտի 1-ի նախադեպը և իրեն դրսևորի՝ ինչպես Մարտի 1-ին: Պողոսյանը, սակայն, հորդորեց քիչ հիշատակել Մարտի 1-ը:
«Կարծում եմ՝ հավաքի ցանկացած կազմակերպիչ խոհեմություն կունենա նորմալ, օրենքի սահմաններում կատարելու իրենց մասսայական միջոցառումը և պատասխանատվություն կրելու հավաքը օրենքի սահմաններում իրականացնելու համար: Իսկ ոստիկանությունը միշտ կատարում է իր վրա դրված գործառույթները»,- նկատեց Պողոսյանը:
Ավելի մանրամասն՝ տեսանյութում: