Ոչ իշխանական եռյակի այսօրվա նիստում քննարկվել են երկուշաբթի օրը սկսվող քառoրյայում համատեղ գործունեության ու մարտավարության, ինչպես նայև հոկտեմբերի 24-ի հանրահավաքի հետ կապված տեխնիկական հարցեր։ Այդ մասին նիստից հետո լրագրողների հետ հանդիպման ժամանակ ասաց «Բարգավաճ Հայաստան» խմբակցության քարտուղար Նաիրա Զոհրաբյանը։ Վերջինս, սակայն, չցանկացավ մանրամասնել, թե խոսքը ինչին է վերաբերում։ Արդյոք եռյակը առաջիկա քառօրյային կմասնակցի՞, թե՞ իշխանափոխության իր պահանջը և առաջիկա հանրահավաքը նկատի ունենալով՝ կարող է այլ մարտավարություն ընտրել և բոյկոտել նիստերը։ Ն. Զոհրաբյանն ասաց, որ ոչինչ չի բացառվում. դա էլ պայքարի քաղաքական գործիքներից մեկն է և կարող է քննարկվել, բայց այս քառօրյան կօգտագործվի ակտիվորեն։
Ն. Զոհրաբյանը նաև ավելացրեց, թե այս հանդիպմանը ՀՅԴ-ի մասնակցությունը նախատեսված չէր, և իրենք որոշել են եռյակով անել։ Ինչ վերաբերում է եռյակը քառյակ դարձնելու և ՀԺԿ-ով համալրելու հարցին՝ ասաց, թե հնարավոր է նաև այլ ուժերի ներգրավումը։
ԲՀԿ խմբակցության քարտուղարն անդրադարձավ նաև «Ժառանգություն» խմբակցության պատգամավոր Զարուհի Փոստանջյանի վերջին հարցազրույցում արված հայտարարություններին և ասաց, թե իրենց գործընկերներն իրենց հորդորել են հիմք ընդունել միայն «Ժառանգության» նախագահի ու փոխնախագահի, մամլո խսսնակի, ինչպես նաև խմբակցության ղեկավարի հայտարարությունները, մյուս անդամների հայտարարություններն իրենց համար հիմք չեն, և այդ պատճառով էլ չեն մեկնաբանում։ Ինչ վերաբերում է քառյակի կամ եռյակի առաջնորդների հնարավոր հանդիպմանը, որի մասին անցած նիստին ասել էր ՀԱԿ խմբակցության ղեկավար Լևոն Զուրաբյանը, Ն. Զոհրաբյանը ոչնչից տեղյակ չէր։
