Եվրասիական տնտեսական միությանն անդամակցելուց հետո Հայաստանն այդ միության ընդհանուր մաքսատուրքերից կստանա մոտ 300 միլիոն դոլար: Այս մասին «Առաջին լրատվական»-ի հետ զրույցում ասաց «Բարգավաճ Հայաստան» խմբակցության պատգամավոր Միքայել Մելքումյանը:
Այժմ Հայաստանում հավաքագրվում է երեք անգամ պակաս՝ մոտ 105 միլիոն դոլար մաքսատուրք: «Մեզ տվել են ԵՏՄ-ի ընդհանուր մաքսատուրքի 1,13 տոկոսը: Քանի որ մինչև այժմ ԵՏՄ-ի երկրներում 26 մլրդ դոլար մաքսատուրք էր հավաքվում, դրա 1,13 տոկոսը կազմում է մոտ 300 մլն դոլար է: Այս առումով մենք կշահենք: Բայց խնդիրը միայն դա չէ, խնդիրը էքսպորտ-իմպորտային հարաբերություններն են»,- ասում է Մ. Մելքումյանը:
Հայաստանը հիմա էլ Ռուսաստանի հետ ունի ազատ առևտրի ռեժիմ: Ի՞նչն է խանգարել, որ մինչև այժմ մեր երկիրը դեպի ՌԴ արտահանման ծավալները չի ավելացրել: «Նույնը մենք Եվրոպայի հետ ունենք, բայց ինչո՞ւ չենք արտահանում: Օրինակ՝ ինչո՞ւ ծխախոտ կամ խմիչք չենք արտահանում Եվրամիության երկրներ: Որովհետև սերտիֆիկացման, ստանդարտացման տեխնիկական կանոնակարգերի պահանջներն այնքան խիստ են, որ նրանք իրենց շուկան պաշտպանում են: Ասենք՝ տարբեր խմիչքներ, սննդի տարբեր ապրանքներ պետք է այդ շուկայից սերտիֆիկատ ստանան: Իսկ հիմա ազատ կլինի»,- ասաց Մ. Մելքումյանը:
