«Առաջին լրատվականի» հարցերին պատասխանում է Հայ-բելգիական առևտրի պալատի քարտուղար Անդրե Սաֆարյանը:
-Հայաստանի՝ Մաքսային միություն մտնելը ի՞նչ ազդեցություն կունենա Հայաստան-Բելգիա առևտրային հարաբերությունների վրա:
– Կարծում եմ՝ փաստը, որ Հայաստանը վերջին պահին մերժեց ԵՄ ասոցացման համաձայնագիրը, փոքր-ինչ ափսոսալի էր, քանի որ շարժ կար այդ ուղղությամբ: Մենք չգիտենք, որն է առավելությունը՝ միանալու Մաքսային միությանը, որովհետև տեղյակ չենք դրան: Շատ լավ գիտենք, թե ինչ առավելություններ կլինեին Հայաստանի և ԵՄ-ի միջև համաձայնագրի դեպքում: Ափսոսալի է, բայց սա այն է, ինչ կա:
Ես կարծում եմ՝ գործակցությունը Հայաստանի և ԵՄ-ի, մասնավորապես նաև Բելգիայի միջև բավական ուժեղ է: Մենք Ֆրանսիայում ունենք 600-700 հազարանոց համայնք, մարդիկ, ովքեր հայկական ծագում ունեն, ուստի կարող եք հասկանալ, ինչ նշանակություն կարող են ունենալ Հայաստանի և արևմտյան երկրների միջև հարաբերությունները: Բայց նաև մենք շատ հայեր ունենք, որոնք ապրում են Ռուսաստանում, ուստի կարծում եմ՝ Մաքսային միությունը կբերի բիզնեսներ և աշխատատեղ Հայաստանի համար:
– Ներկայումս որքա՞ն է առևտրաշրջանառությունը Հայաստանի և Բելգիայի միջև, և որքանո՞վ այն կփոխվի Հայաստանի անդամակցությամբ ԵՄՏ-ին:
– Ապրանքաշրջանառության ամենամեծ հատվածը ադամանդագործությունն է, որովհետև մենք ունենք ադամանդագործական մեծ արտադրություն: Սա առաջինն է:
2005-ին թվականից մենք՝ որպես հայ-բելգիական առևտրի պալատի ներկայացուցիչներ, փորձում ենք ներկայացնել բելգիական ընկերությունները հայաստանյան շուկայում և բելգիացիներին ուղղորդել Հայաստան, որ նրանք իրենց գործընկերներին գտնեն Հայաստանում: Դա ընթացիկ աշխատանք է, որպեսզի հայ-բելգիական համատեղ ձեռնարկներ լինեն, փորձի փոխանակում, դուստր ընկերություններ և այլն:
Անցյալ տարի մենք բերեցինք ջրային պաշարների կառավարմամբ զբաղվող մի ընկերություն, և նրանք աշխատեցին Հայաստանում: Փորձում ենք մոտիվացնել Բելգիայի ՓՄՁ-ներին, որ Հայաստանում ներկայանան և ներկայացնեն իրենք արտադրանքը: Սակայն հիմնական ոլորտը առևտրի շարունակում է մնալ ադամանդագործությունը:
– Հայաստանի՝ ԵՏՄ անդամակցությամբ խոչընդոտներ կարո՞ղ են առաջանալ առևտրի և բիզնես հարաբերությունների հարցում:
– Ես չեմ կարծում: Փաստ է, որ Հայաստանը մերժեց ԵՄ-ի հետ խոր և համապարփակ ազատ առևտրի գոտու պայմանագիրը, որը պատրաստել էր ԵՄ-ն, բայց այն, ինչ մնացել է, մեր հարաբերություններն են մարդկանց և ընկերությունների միջև: Կարծում եմ՝ Հայաստանին անհրաժեշտ են բելգիական ընկերությունների փորձն ու հմտությունները: Մենք պահելու ենք մեր հարաբերությունները Հայաստանի հետ: Հայաստանը կարևոր երկիր է Բելգիայի հայերի համար: Մի փակեք դռները, մնացեք բաց Բեգլիայի և Եվրոպայի համար: Դա շատ կարևոր է մեզ ու ձեզ համար: