Գործարար Փայլակ Հայրապետյանն ու նրան սնանկացման եզրին հասցրած Աշոտ Սուքիասյանն առերեսվել են դեռևս մի քանի օր առաջ, ընդ որում՝ ոչ առաջին անգամ: Այդ մասին «Առաջին լրատվական»-ի հետ զրույցում ասաց Փայլակ Հայրապետյանը՝ հավելելով, որ ինքը պարզապես չէր ցանկանում, որ այդ մասին բարձրաձայնվի, քանի որ, իր խոսքով, հոգնել է այս ամենից:
«Առերեսման ժամանակ ես նրան հարցեր տվեցի, թե ինչ հիմքերի վրա է բանկը բիզնես պլան գրել, ինչի համար են այդքան հսկայական գգումարներ տրամադրել առանց հիմքի: Ես նրան նաև հարցրի Կճոյանից ու Տիգրան Սարգսյանից, իրենց անուններով օֆշորում բացված երեք ձեռնարկություններից, դրանց հաշվին ուղարկված փողերից: Աշոտն ասաց, որ Կճոյանի և Տիգրան Սարգսյանի անունները, այո, ինքն է գրել, որպեսզի իրեն հովանավորեն:
Փաստորեն, մեր վարչապետն ու հոգևոր հայրը հովանավորել են Աշոտի նման գողերին»,- մեզ հետ զրույցում ասաց Հայրապետյանը՝ հավելելով, որ Աշոտ Սուքիասյանը բացարձակապես չի հերքել վերը նշված անձանցից ստացած հովանավորության մասին:
Հայրապետյանը նաև հարցրել է՝ ընկերությունները օֆշորային գոտում գրանցելուց Տիգրան Սարգսյանն ու Կճոյանն անձա՞մբ են ստորագրել և տվել իրենց համաձայնությունը: Սուքիասյանը, սակայն, պատասխանել է, որ դա ինքն անձամբ է արել, և նրանք կապ չունեն գրանցման հետ: «Բայց սուտ է ասում, սուտ է խոսում: Բայց ավել բան ես չեմ էլ ակնկալում: Եթե Աշոտն ասում է, որ նրանց անունները գրել է այդ ընկերություններում, որ նրանք իրեն հովանավորեն, ապա դրանից այն կողմ մնացածն արդեն կարևոր չէ: Ամեն ինչ շատ պարզ է»,- ասաց Փ. Հայրապետյանը:
Առերեսման ժամանակ Հայրապետյանը նաև հետաքրքրվել է, թե ինչի վրա է ծախսվել «Ամերիաբանկի» տրամադրած վարկը, որը տրվել էր իր ունեցվածքի գրավադրման արդյունքում: Սուքիասյանը, սակայն, նշել է, որ ինքն այդ գումարը չի ծախսել, «իրեն քցել են»:
Հայրապետյանը նշեց, որ դեռ հայտնի չէ, թե գործն ինչ ընթացքով կգնա: «Մարդկանց են քննում, բանկ են գնում, հարցեր են պարզվում: Դեռ չգիտեմ՝ ինչ կլինի: Պարզապես հոգնել եմ էս խուլիգանների անմարդկային վերաբերմունքի ձեռը: Սա պետությո՞ւն է, թե՞ ինչ»,- ասաց նա:
Նշենք, որ Օֆշորային սկանդալի հիման վրա հարուցված քրեական գործը քննում է ոստիկանության Քննչական գլխավոր վարչության ՀԿԳ քննության վարչությունը: Աշոտ Սուքիասյանին մեղադրանք է առաջադրվել առանձնապես խոշոր չափերի խարդախության (Քր. օր. 178-րդ հոդվածի 3-րդ մասի 1-ին կետ), խաբեության կամ վստահությունը չարաշահելու եղանակով առանձնապես խոշոր չափերի գույքային վնաս պատճառելու (184-րդ հոդ. 2-րդ մասի 1-ին կետ) և հանցավոր ճանապարհով ստացված առանձնապես խոշոր չափերի եկամուտներ օրինականացնելու (190-րդ հոդ. 3-րդ մասի 1-ին կետ) համար: Սուքիասյանը, սակայն, իրեն մեղավոր չի ճանաչում առաջադրված մեղադրանքում:
Լուսանկարը՝ Hetq.am-ի