Ադրբեջանական day.az կայքի հաղորդմամբ, ադրբեջանական ռազմական փորձագետ Յըլդըրըմ Մամեդովն անդրադարձել է Լեռնային Ղարաբաղի հիմնախնդրի կարգավորմանը.
«Միջազգային միջորդները դեռևս ոչ մի անգամ ուշադրություն չեն դարձրել «հայկական ագրեսիային», ինչն էլ ոգևորում է «զավթիչին»:
Տարածաշրջան դիտորդական հանձնաժողովներ գործուղող միջազգային միջնորդները հենց իրենք են հանդիսանում տարածաշրջանում կոնֆլիկտային իրավիճակի դրդողներ: Ըստ էության, նրանք ոչինչ չեն ձեռնարկում «ագրեսորին սանձահարելու» համար և, շրջելով տարածաշրջանի երկրներում, զբաղված են միայն «հարկահավաքությամբ»:
Նրանք ցույց են տալիս, թե ամեն ինչ իրենց վերահսկողության տակ է, մինչդեռ իրականում նրանց կատարելապես չի հետաքրքրում հակամարտությունից տուժող տեղական բնակչության ճակատագիրը:
Լռելով Ղարաբաղի մասին` նրանք դրանով իսկ «քարտ-բլանշ են տալիս ագրեսորին»: Տարածաշրջանում անցկացված մոնիթորինգների արդյունքում ոչ մի անգամ չեն արձանագրվել մեր կորուսյալ տարածքներում ադրբեջանական մշակութային հուշարձանների «ոչնչացման, ապօրինի հանքարդյունահանությամբ ու անտառահատումներով» զբաղվելու փաստեր:
Նմանատիպ գործողություններ ձեռնարկելով` Հայաստանն Ադրբեջանին «դրդում» է ռազմական գործողությունների: Հայաստանն արդեն իսկ ունի մշակված սխեմա, թե ինչպես պետք է գործել Ադրբեջանում Նովրուզի տոնակատարության ժամանակ, երբ շփման գծում ավելանում են բախումներն ու մեր զինծառայողների կորուստները:
Մենք պետք է Հայաստանի այդ քայլին տասնապատիկ ռազմական պատասխան տանք: Եթե մենք վարվենք նման կերպ, ապա վերջ կդնենք Հայաստանի «ռազմական արկածախնդրությանը»:
Այստեղ ադրբեջանական ռազմական փորձագետին պետք է հիշեցնել նախորդ տարվա դեկտեմբերին թուրքական ամենաազդեցիկ թերթերից մեկի` Zaman-ի վերլուծաբան Ֆիքրեթ Էրթանի «Հայաստանը շարունակում է զինվել» հոդվածը.
«Չնայած Հայաստանը սակավաթիվ բնակչություն ունի, նրա զինված ուժերը համարվում են Կովկասի ամենապրոֆեսիոնալ, ամենալավ պատրաստված և ամենաշարժունակ զինված ուժերը։
Թե որքանով է այս ամենը ճիշտ՝ դժվար է ասել, սակայն մի բան ակնհայտ է. նախկինում Հայաստանը կարողացել է առավելության հասնել Ադրբեջանի նկատմամբ «զավթելով» ադրբեջանական հողերի «20 տոկոսը», և ցայժմ ոչ ոք չի կարողանում վիճարկել դա»: