Ջորջ Քլունիի և Ամալ Ալամուդինի հարսանեկան ընդունելության ժամանակ հարսնացուի համալսարանական ընկերուհի Ջե Քիմը կենաց է ասել՝ նշելով, որ Ամալի համար շատ դժվար էր իրեն արժանի տղամարդ գտնել, քանի որ շատ պոտենցիալ թեկնածուների վախեցնում էին նրա ինտելեկտը և ազդեցությունը: Այս մասին գրում է Spletnik.ru-ն:
Ամալի վաղեմի ընկերուհին հյուրերին նաև պատմել է, որ Ամալի պահանջմունքներն ապագա կողակցի հանդեպ շատ բարձր էին. «Նրան պետք էր իդեալ: Նա վստահ էր, որ մինչև կյանքի վերջը այդպես էլ չի հանդիպի արժանավոր զուգընկերոջ»:
Բացի այդ, Քիմը սկզբում զգուշորեն է վերաբերվել ընկերուհու և Քլունիի սիրավեպին՝ վերջինիս համբավի պատճառով:
Ջե Քիմն ընդգծել է, որ վերջին տարում իր ընկերուհին սկսել է ավելի հաճախ ժպտալ:
«Այժմ ժպիտն այդպես էլ չի անհետանում Ամալի դեմքից: Նա նաև թողել է ծխելը: Մի՞թե դա իսկական հեքիաթ չէ»,- ասել է Քիմը: