Մեքսիկայում ձերբակալվել է «Բելտրան Լեյվի եղբայրներ» թմրակարտելի պարագլուխ Էկտոր Բելտրանը՝ Գլխավոր դատախազության աշխատակիցների կողմից անցկացված հաջող օպերացիայի արդյունքում, որին մասնակցել է նաև բանակային ստորաբաժանումը: Այս մասին փոխանցում է ITAR-TASS-ը՝ հղում անելով Մեքսիկայի իշխանությունների ներկայացուցիչներին:
Նա քրեական շրջանակներում հայտնի է եղել «Էլ-Աչե» մականունով: Նրա ձերբակալությունից մանրամասներ չեն հրապարակվել: Դատախազության ներկայացուցիչները նշել են, որ այժմ անցկացվում է ձերբակալվածի ԴՆԹ փորձաքննություն՝ լիովին հաստատելու նրա ինքնությունը:
Ավելի վաղ ԱՄՆ իշխանությունները մոտ 5 մլն դոլարի պարգևավճար էին խոստացել տեղեկատվության դիմաց, որը կօգներ ձերբակալել Բելտրանին: Իրենց հերթին Մեքսիկայի իշխանությունները տեղեկության համար ավելի քան 30 մլն դոլար էին առաջարկել: Թմրակարտելը զբաղվում է թմրանյութի խոշոր խմբաքանակներ ԱՄՆ ուղարկելով: