Լոնդոնյան հայտնի կարմիր հեռախոսախցիկները շուտով կանաչ կդառնան և կսնվեն արևի մարտկոցներով, հաղորդում է AFP գործակալությունը՝ հղում կատարելով ծրագրի հեղինակներին:
Նշվում է, որ նման առաջին հեռախոսախցիկն արդեն տեղադրված է: Հաջորդը կտեղադրվի հունվար ամսին: Կանաչ գույնը պետք է ընդգծի դրանց էկոլոգիապես մաքուր լինելը:
«Էներգիան հավաքվում է մարտկոցում, դուք կարող եք լիցքավորել ձեր հեռախոսը նույնիսկ գիշերը կամ այն ժամանակ, երբ արև չկա: Մենք ցանկանում ենք ցույց տալ, թե ինչպես կարող է հասարակական տարածքն օգտակար լինել: Եվ դրանից բացի, Լոնդոնը պետք է էկոլոգիապես ավելի մաքուր դառնա: Այժմ հեռախոսախցիկների մեծ մասի ժամանակն արդեն անցել է, և մարդիկ հաճախ դրանք որպես զուգարան են օգտագործում»,- մշակողների խոսքերն է մեջբերում գործակալությունը: