Ինչպես արդեն տեղեկացրել ենք, երեկ հրապարակվել է FIDE-ի դասակարգման նոր աղյուսակը: Շախմատի Հայաստանի հավաքականի առաջին համար Լևոն Արոնյանը, ով մոտ 3 տարի գտնվում էր աղյուսակի 2-րդ հորիզոնականում, նահանջել է 3 տեղով և այժմ 5-րդն է: Լևոնի ակտիվում կա 2793 միավոր: Առաջատար Մագնուս Կարլսենն ունի 2863 միավոր:
Արոնյանն 1in.am Sport-ի հետ զրույցում նշեց, որ դժգոհ է վերջին՝ Սենթ-Լուիսի մրցաշարում իր խաղից: Նա ասաց, որ 5-րդ հորիզոնականը չի համարում այն տեղը, որտեղ պետք է գտնվի ինքը: Արոնյանը խոսեց նաև Ֆաբիանո Կարուանայի (2844 միավոր) մասին, ով վերջին շրջանում վստահ ելույթ է ունենում ու երկրորդն է վարկանիշային աղյուսակում:
«Վերջին մրցաշարում՝ ԱՄՆ-ում, լավ չխաղացի, բայց չեմ կարծում, որ սա իմ տեղն է: Կարուանան շատ լավ է խաղում: Երևում է, որ շատ լուրջ է աշխատում: Պատմության մեջ քիչ մարդիկ են եղել, որ շախմատն այսքան երիտասարդ տարիքում (խմբ.- Կարուանան 22 տարեկան է) այսքան լուրջ են ընդունել: Այս մասին մտածելիս Կրամնիկին եմ հիշում: Իմ կարծիքով Կրամնիկն ավելի տաղանդավոր շախմատիստ է:
Հետաքրիքր կլինի մրցելը: Երեք տարի երկրորդ տեղում էի, բայց, ինչպես ասում են՝ մի քայլ հետ, երկու քայլ առաջ: Կպայքարեմ ոչ թե երկրորդ, այլ առաջին տեղի համար:
Արոնյանն անդրադարձավ նաև առաջիկա ծրագրերին: Լևոնի մասնակցությամբ հաջորդ մրցաշարը կմեկնարկի նոյեմբերի 3-ին: Նա մասնակցելու է ՌԴ մայրաքաղաք Մոսկվայում կայանալիք աշխարհի 9-րդ չեմպիոն Տրիգրան Պետրոսյանի հիշատակին նվիրված միջազգային մրցաշարին:
«Պատրաստվում եմ մասնակցել Մոսկվայում կայանալիք Տիգրան Պետրոսյանի հուշամրցաշարին: Մինչև տարեվերջ Նակամուրայի դեմ մրցախաղի եմ մասնակցելու ԱՄՆ-ում և Չինաստանում մասնակցելու եմ արագ շախմատի ամենամյա մրցաշարի»,- ասաց Արոնյանը: