Ինչպես արդեն հայտնել ենք, հոկտեմբերի 3-6-ն ամերիկյան Նյու Ջերսի քաղաքում ընթանալու է ըմբշամարտի բանակայինների աշխարհի 29-րդ առաջնությունը, որին ըստ նախնական հայտերի մասնակցելու են 24 երկրների ավելի քան 200 ըմբիշներ, այդ թվում նաև օլիմպիական խաղերի և աշխահի առաջնությունների մրցանակակիրներ:
Հայաստանի պատվիրակներից անցյալ տարի բանակայինների աշխարհի առաջնությունում մրցանակակիրներ են դարձել երկուսը: Հունահռոմեական ոճի ըմբիշ Գևորգ Սահակյանը նվաճել է աշխարհի փոխչեմպիոնի տիտղոսն ու արժանացել է արծաթե մեդալի, իսկ ազատ ոճային Վիկտոր Կազիշվիլին՝ բրոնզե պարգևով է տուն վերադարձել:
Ազատ և հունահռոմեական ոճի ըմբշամարտի առաջատար ըմբիշները, որոնք այժմ գտնվում են պարտադիր զինծառայության մեջ այս անգամ ևս կմասնակցեն բանակայինների աշխարհի առաջնությանը:
ԱՄՆ մեկնող մեր պատվիրակության կազմում տեղ են գտել միջազգային կարգի մրցավար Գևորգ Ալեքսանյանը, ազատ ոճի ըմբշամարտի Հայաստանի երիտասարդական հավաքականի գլխավոր մարզիչ Ավետիք Վարդանյանը, հունահռոմեկան ոճի ըմբշամարտի վաստակավոր մարզիչ Էդուարդ Սահակյանը և 9 ըմբիշներ:
Այս տարի Նյու Ջերսիում Հայաստանի մարզական պատիվն են պաշտպանելու ազատ ոճայիններ՝ Արտակ Հովհաննիսյանը, Նարեկ Սանոյանը ու Վիկտոր Կազիշվիլին, իսկ հունահռոմեականներից Ռոբերտ Կիրակոսյանը, Գևորգ Սահակյանը, Կարապետ Չալյանը, Ռաֆայել Ալեքսանյանը, Մաքսիմ Մանուկյանն ու Մովսես Ադամյանը, ովքեր կջանան զարգացնել նախորդ տարվա հաջողությունները:
Առաջնության ընթացքին հոկտեմբերի 3-ից ուղիղ հեռարձակմամբ կարող եք հետևել մեր կայքում:
