Շատ շուտով Հայաստանն ու Եվրոպական միությունը կկազմակերպեն երկկողմ հանդիպում՝ ՀՀ-ԵՄ համագործակցության ոլորտների հստակեցման նպատակով: Այսօր մի շարք լրագրողների հետ զրույցում այս մասին ասաց ՀՀ-ում ԵՄ պատվիրակության ղեկավար Տրայան Հրիսթեան՝ անդրադառնալով հարցին, թե արդյոք ՀՀ իշխանությունները ներկայացրե՞լ են առաջարկներ ՀՀ-ԵՄ հարաբերությունների վերաբերյալ, և ե՞րբ կարելի է հստակության սպասել:
Դեսպանը տեղեկացրեց, որ այս հարցի առնչությամբ նախատեսում են անցկացնել քննարկումներ, որոնք նախապատրաստական աշխատանքների փուլում են: «Այսինքն՝ մենք արդեն աշխատում ենք մեր հայաստանյան գործընկերների հետ: Շատ շուտով մենք կկազմակերպենք երկկողմ հանդիպում՝ նվիրված այս հարցին: Դուք պետք է հասկանաք, որ այսպիսի հանդիպումը պետք է մանրակրկտորեն նախապատրաստվի: Հանդիպումը նվիրված է լինելու համագործակցությունը շարունակելու փոխընդունելի օրակարգին, համագործակցության ոլորտների հստակեցմանը: Լիահույս եմ, որ առաջիկայում ավելի հստակ պատկեր կունենանք այս հարցի կապակցությամբ»,- ասաց դեսպանը:
Վերջինս վստահություն հայտնեց, որ այդ հանդիպումը տեղի կունենա շատ շուտով: «Ինչպես ասացի, ընթացքի մեջ են նախապատրաստական աշխատանքները, ու իմ համոզմամբ՝ այստեղ շատ ավելի կարևոր է էությունը, քան վերջնաժամկետը»,- այսպես ավարտեց իր խոսքը ՀՀ-ում ԵՄ պատվիրակության ղեկավար Տրայան Հրիսթեան:
Հիշեցնենք, որ անցյալ տարվա սեպտեմբերի 3-ից հետո, երբ ՀՀ նախագահ Սերժ Սարգսյանը հայտարարեց, որ Հայաստանը միանում է Եվրասիական ինտեգրացիոն պրոյեկտներին, Հայաստան-ԵՄ հարաբերությունների օրակարգն անորոշ է: Ու թեև Հայաստանն ամենաբարձր՝ ՀՀ նախագահի մակարդակով հայտարարել է, որ ցանկանում է շարունակել ԵՄ-ի հետ քաղաքական մակարդակի հարաբերությունները, ցանկություն է հայտնել ստորագրել Ասոցացման համաձայնագիրն առանց ԽՀԱԱԳ պայմանագրի, այնուամենայնիվ՝ ԵՄ-ին չի ներկայացրել այն ոլորտները, որոնցում Հայաստանը կարող է շարունակել ԵՄ-ի հետ համագործակցությունը, քանի որ առաջիկայում Հայաստանը ՄՄ-ին անդամակցելու դեպքում կունենա միջազգային պարտավորություններ, որոնք անհամատեղելի են ԵՄ ԱՀ/ԽՀԱԱԳ-ի հետ:
