Կահույքի շվեդական արտադրող և վաճառող IKEA ընկերությունը ամբողջ աշխարհում ցանցի խանութներից հետ է կանչում սեփական ապրանքանիշի ներքո վաճառվող՝ բոլոր ամսաթվերին արտադրված մակարոնի 2 տեսակ՝ pastalgar fullkorn և pastalgar: Ընկերության ներկայացուցիչների խոսքով՝ ապրանքը կարող է սոյա պարունակել, որը նշված չէ պիտակի վրա: Այս մասին հայտնում է ITAR-TASS-ը՝ հղում անելով IKEA-ի հաղորդագրությանը:
IKEA-ն այս քայլը համարում է զգուշություն, քանի որ «սոյան ալերգեն է, իսկ սոյայից ալերգիա ունեցողները կարող են ապրանքն օգտագործելուց ալերգիկ ռեակցիա ունենալ»: Ընկերությունում նշում են, որ նրանց համար, ովքեր սոյայից ալերգիա չունեն, պաստան անվտանգ է:
1943 թ. Շվեդիայում հիմնված IKEA ընկերությանն է պատկանում կահույքի և տան համար ապրանքների աշխարհի խոշորագույն առևտրական ցանցերից մեկը: