Թուրքիայի կառավարությունը խորհրդարանից մանդատ է խնդրել բանակի համար Սիրիայում և Իրաքում «Իսլամական պետության» դեմ պայքարի շրջանակներում անդրսահմանային գործողությունների համար: Թույլտվության ժամկետը 1 տարի է, սկսվում է հոկտեմբերի 4-ից:
ITAR-TASS-ի հաղորդմամբ՝ տեղի մամուլում մանրամասներ են հրապարակվել դիմումի տեքստի բովանդակության մասին, որից նաև հետևում է, որ Թուրքիան պատրաստ է իր տարածքը տրամադրել օտարերկրացի զինվորականներին:
Երկրի վարչապետ Ահմեդ Դավութօղլուի ստորագրած դիմումը կետ է պարունակում Թուրքիայի զինված ուժերին իրավունք վերապահելու մասին՝ «անհրաժեշտության դեպքում պայքար մղել ու անդրսահմանային գործողություններ իրականցանել և դրա համար զինվորականներ ուղարկել արտասահման»:
Նույն նպատակով կառավարությունը խորհրդարանից «թուրքական տարածքում օտարերկրյա զինված ուժերի ներկայության» թույլտվություն է խնդրում:
Կառավարության հարցումը խորհրդարանում կքննարկվի հոկտեմբերի 2-ին: Եթե այն ընդունվի, բանակը հնարավորություն կստանա ակտիվորեն մասնակցելու միջազգային կոալիցիայի գործունեությանը, նաև պաշտպանելու Սիրիայում գտնվող՝ Օսմանական կայսրության ղեկավարների նախնի Սուլեյման շահի գերեզմանը:
Հիշեցնենք՝ ավելի վաղ լիբանանյան «Ալ-Մայադին» հեռուստաալիքը հաղորդում էր, որ «Իսլամական պետության» զինյալները Սիրիայի Հալեպ նահանգում գերի են վերցրել Սուլեյման շահի գերեզմանը պահպանող 20 թուրք զինվորականի: Չորեքշաբթի Անկարան դեռ չի մեկնաբանել այս տեղեկությունը: Սակայն երեքշաբթի երկրի փոխվարչապետ Բյուլենթ Արընջը հայտարարել է, որ բոլոր զինվորականները գերեզմանոցի տարածքում «շարունակում են ծառայությունը զենքով և բոլոր սարքավորումներով»: