Վերակառուցման և զարգացման եվրոպական բանկը, որը Հայաստանում աշխատում է տեղական 9 բանկերի հետ և շուրջ 50 մլն եվրոյի ծրագրեր է իրականացնում Հայաստանում, շարունակելու է աշխատանքը հայկական բանկերի հետ Մաքսային միությանը Հայաստանին անդամակցությունից հետո: Այսօր Երևանում կազմակերպված համաժողովի ժամանակ լրագրողների հարցին, թե ինչ կարող է փոխվել ՎԶԵԲ-ի և հայաստանյան գործընկերների փոխհարաբերություններում Հայաստանի՝ ՄՄ-ին անդամակցությունից հետո, Կենտրոնական Ասիայի և Կովկասի ֆինանասական հաստատությունների գծով ՎԶԵԲ-ի տնօրեն Մայք Թեյլորն ասաց. «Պիտի սպասենք, տեսնենք, թե ինչ զարգացումներ կլինեն, որովհետև այդ զարգացումները մեզ համար էլ են հետաքրքիր»: Ապա Թեյլորը հավելեց. «Բայց անկախ նրանից, թե ինչպիսի զարգացումներ կլինեն, մենք հավատարիմ ենք մնում Հայաստանում մեր գործընկերներին, հատկապես մեր վստահությանն արժանացած բանկերին, և շարունակելու ենք զարգացնել այդ բիզնեսը»:
ՎԶԵԲ-ի տնօրենը կարծում է, որ Հայաստանը մեծ ներուժ ունի, սակայն անհրաժեշտ է ձևավորել ֆինանսավորման նոր գործիքներ, որպեսզի խթանվի փոքր ու միջին ձեռնարկությունների աշխատանքը Հայաստանում:
