Այսօր ԵՄ աջակցությամբ մեկնարկեց «Հայաստանի բարձրագույն կրթության ոլորտի հզորացում Եվրոպական բարձրագույն կրթական տարածքին ինտեգրվելու նպատակով» թվինինգ ծրագիրը: Ծրագրի նպատակն է սոցիալական զարգացման շրջանակում համագործակցության ամրապնդումը, մասնավորապես՝ ԵՄ լավագույն փորձին համահունչ կրթական բարեփոխումների, ուսուցման համակարգի կատարելագործման, որակի ապահովման ուղղություններով, ինչպես նաև բարձրագույն կրթության համակարգի բարեփոխումը, որը կնպաստի կրթության որակի բարելավմանը և աշխատաշուկայի պահանջների համապատասխանության ապահովմանը:
Ծրագիրն իրականացնելու է ՀՀ ԿԳՆ-ն՝ Ֆինլանդիայի կրթության գնահատման կենտրոնի և Գերմանիայի կրթության և հետազոտությունների դաշնային նախարարության հետ համատեղ: Ծրագրում ընդգրկված են Հայաստանի բարձրագույն ուսումնական հաստատությունները և Մասնագիտական կրթության որակի ապահովման ազգային կենտրոնը: Ծրագրում ներգրավված են շուրջ 60 միջազգային փորձագետներ՝ Ֆինլանդիայից, Գերմանիայից և Էստոնիայից:
Ծրագրում ներառված են հետևյալ բաղադրիչները՝ ՀՀ բարձրագույն կրթության ոլորտը կարգավորող օրենսդրության և Որակավորումների ազգային շրջանակի վերանայում, ԿԳՆ-ի, ՈԱԱԿ-ի և բուհերի աշխատակիցների կարողությունների ընդլայնում՝ Բոլոնիայի գործընթացի իրականացումն ու շարունակականությունն ապահովելու նպատակով, բուհերում Բոլոնիայի գործընթացի հիմնական ուղղություններով իրականացվող ծրագրերի աջակցություն, գործատուների և ուսանողների պահանջներին համապատասխան ՈԱՇ-ի ներդրում:
Թվինիգ ծրագրի մեկնարկի համաժողովի ընթացքում իրենց ողջույնի խոսքով հանդես եկան ՀՀ կրթության և գիտության նախարարի տեղակալ Կարինե Հարությունյանը, ՀՀ-ում ԵՄ պատվիրակության ղեկավար Տրայան Հրիսթեան, ՀՀ Էկոնոմիկայի նախարարի առաջին տեղակալ Գարեգին Մելքոնյանը, ՀՀ-ում Ֆինլանդիայի դեսպան Քրիստեր Միխելսոնը և ՀՀ-ում Գերմանիայի դեսպան Ռայներ Մորելը:
Ծրագիրը ներկայացրին ծրագրի մշտական խորհրդատուն, ղեկավարն ու համաղեկավարը: Ծրագրի բյուջեն կազմում է 1 միլիոն եվրո, ծրագիրը նախատեսված է 24 ամսվա համար:
Առաջարկում ենք մանրամասներին ծանոթանալ տեսանյութի միջոցով: