Ամերիկացի հայտնի վիրտուոզ ջութակահար Ջոշուա Բելը երկրորդ անգամ համերգ է տվել Վաշինգտոնի մետրոյում: 46-ամյա հայտնի երաժշտի ելույթը կայացել է երեքշաբթի օրը՝ Union Station կայարանի նախասրահում: Յոհան Սեբաստիան Բախի և Ֆելիքս Մենդելսոնի ստեղծագործությունները նրա հետ միասին կատարել են նրա 9 աշակերտները՝ հայտնում է ITAR-TASS-ը:
Բելն այսպիսի փորձ առաջին անգամ կատարել է 7 տարի առաջ, երբ մայրաքաղաքի մետրոյի կայարաններից մեկում Ստրադիվարիուսի 1713թ. ջութակով ծպտված նվագել է մեծ կոմպոզիտորների գործերը: Ջութակահարի խոսքով՝ ինքն ուզում էր տեսնել՝ ամերիկացիները որքանո՞վ են հետաքրքրվում երաժշտությամբ:
Այս անգամ վիրտուոզի գլխավոր նպատակն էր «հասարակ մարդկանց ուշադրությունը սևեռել արվեստի այդ տեսակի ճանաչողության կարևորությանը»: «Երաժշտությունը պետք է մեզնից յուրաքանչյուրի կյանքի մասը լինի, որովհետև այն մեզ ավելի լավն է դարձնում»,- կարծում է Բելը:
30-րոպեանոց համերգը, որը դասական երաժշտության տասնյակ գնահատողների է հավաքել, նաև լավ գովազդ է եղել նրա նոր՝ «Բախ» ալբոմի համար, որը վաճառքի է հանվել սեպտեմբերի 30-ին:
