Ինչպես հայտնի է, Սահմանադրական բարեփոխումների մասնագիտական հանձնաժողովն ընդամենը 15 օրից Սերժ Սարգսյանին պետք է ներկայացնի Սահմանադրական բարեփոխումների նախագիծը: Այն արդեն իսկ ուղարկվել է Վենետիկի հանձնաժողով, որը մոտեցումներ, կարծիքներ և խորհուրդներ է հայտնել նախագծի վերաբերյալ, որոնց հիման վրա մասնագիտական հանձնաժողովի կողմից նախագիծը վերջնական տեսքի կբերվի և նորից կներկայացվի Վենետիկի հանձնաժողովին վերջնական եզրակացության համար: Ամենայն հավանականությամբ, Վենետիկի հանձնաժողովն իր վերջնական եզրակացությունը նախագծի վերաբերյալ կտա հոկտեմբերի 10-ին, որից 5 օր անց այն կներկայացվի Սերժ Սարգսյանի դատին:
Մասնագիտական հանձնաժողովի անդամ Գագիկ Ղազինյանն «Առաջին լրատվական»-ի հետ զրույցում ասաց, որ ինքը տեղյակ չէ, թե Վենետիկի հանձնաժողովն ինչ հարցերի շուրջ է նկատառումներ հայտնել: Մասնագիտական հանժնաժողովի նիստ դրանից հետո չի գումարվել:
Ինչ վերաբերում է հայեցակարգի վերջնական տեսքին, որը պետք է ուղարկվի Վենետիկ, ապա նաև ներկայացվի Սերժ Սարգսյանին, Ղազինյանն ասաց, որ դեռ վերջնական մոտեցում չկա, թե այն ինչ տեսք կունենա: Չի բացառվում, որ նախագծի երկու տարբերակ ներկայացվի նախագահին: «Երկաստիճան դատական համակարգի կամ կառավարման համակարգի փոփոխության շուրջ վերջնական քննարկում մասնագիտական հանձնաժողովում չի եղել: Բայց նախագծի վերջնական տարբերակը Վենետիկի հանձնաժողովին ներկայացնելուց առաջ կորոշվի նաև, թե ինչպես ենք վարվելու վերջնական տարբերակի հետ: Կորոշենք՝ նախագիծը Վենետիկ գնում է որպես երկընտրելի, որպեսզի քաղաքական ուժերին հնարավորություն տրվի ընտրելու, թե՞ հանձնաժողովն իր վրա կվերցնի առաքելությունը որոշելու, թե ինչ է որոշվելու վերջնական տարբերակում: Հնարավոր է նաև տարբերակ, որ երկու մոտեցումն էլ դրվի քաղաքական ուժերի քննարկմանը, որոնք որ պետք է տեղի ունենան հոկտեմբեր-նոյեմբեր ամիսներին»,- ասաց Ղազինյանը:
Նրանից հետաքրքրվեցինք՝ սահմանդրական փոփոխությունների շուրջ քաղաքական ուժերի մոտ առկա անհամաձայնության կամ տարակարծության այս ֆոնին ինչպե՞ս է կողմնորոշվելու մասնագիտական հանձնաժողովը իր անելիքներում և նախագիծը վերջնական տեսքի բերելու հարցում: «Մասնագիտական հանձնաժողովը կողմնորոշվելու խնդիր չունի: Կողմնորոշվողը պետք է լինի քաղաքական դաշտը եւ հանրությունը: Այս պահին հանձնաժողովը դեռ չի կողմնորոշվում՝ ներկայացնել մեկ տարբերակ իր հիմնավորումներով, թե՞ ներկայացնի երկու տարբերակը իր դրական և բացասական կողմերով: Բայց այս հարցը վերջնական քննարկման առարկա չի դարձել: Այսինքն՝ հնարավոր է նախագահին ներկայացվի նախագծի երկու տարբերակ, քանի որ դրանից հետո սպասվում են քաղաքական քննարկումներ հայեցակարգի շուրջ: Հանձնաժողովը վերջնական ուղղումների, մասնագիտորեն ձևակերպման հեղինակն է, այլ ոչ թե վերջնական առաջարկ ներկայացնողն այս կամ այն ձևի վերաբերյալ, որի շուրջ կան տարաձայնություններ: Մնացած հարցերում արդեն նախագահը կորոշի ինչպես վարվել հայեցակարգի հետ որպես պատվիրատու»,- ասաց նա։
Ինչ վերաբերում է հանձնաժողովի անդամների շրջանում առկա տարաձայնությանը, ապա Ղազինյանն ասաց, որ դեռ քննարկում չի եղել, որտեղ կհնչեն վերջնական տեսակետները: Իսկ կանոնակարգը ենթադրում է, որ վիճահարույց հարցերի շուրջ փոքրամասնություն ներկայացնող տեսակետի հեղինակը կամ մասնագիտական հանձնաժողովի անդամը ներկայացնի հատուկ կարծիք:
Նշենք, որ ավելի վաղ Ղազինյանը մեզ հետ զրույցում ասել էր, որ սահմանադրական բարեփոխումների վերջնական հայեցակարգում պետք է ընտրվի վիճահարույց ինստիտուտներից մեկը: Նա ասել էր, որ երկու տարբերակն իրար հետ չեն կարող ներկայացվել: «Հանձնաժողովը բոլոր հարցերի շուրջ իր մոտեցումները կորոշի քվեարկությամբ: Հանձնաժողովը քվեարկությամբ կորոշի յուրաքանչյուր ինստիտուտի ճակատագիրը՝ մանավանդ նրանց, որոնք այլընտրանքային տարբերակներով են ներկայացված: Խոսքը վերաբերում է և դատական համակարգի երկաստիճան-եռաստիճան համակարգին, և երկրի կառավարման ձևին, և այլ հարցերի»,- ասել էր Ղազինյանը:
Փաստորեն, վերջին պահին կարող է բավական հետաքրքիր որոշում կայացվել: Սերժ Սարգսյանին կներկայացվի սահմանադրական բարեփոխումների 2 տարբերակ, և այդպիսով առաջիկա ամիսներին և տարվա ընթացքում քաղաքական քննարկումների թիվ մեկ թեման կդառնան ՍԴ փոփոխությունները, որոնք երկրի առաջ ծառացած խնդիրներից բոլորին շեղելու ամենահարմար եղանակն է: