Մեքսիկայի գլխավոր դատախազ Խեսուս Մուրիլիոն հայտնել է, որ երեք զինվորներ, ովքեր մասնակցել են հանցավոր խմբավորումների անդամների դեմ հատուկ գործողությանը, մեղադրվում են կանխամտածված սպանության մեջ: Այս մասին հայտնում է Reuters գործակալությունը:
Դատախազի տվյալներով՝ զինվորականները փոխհրաձգության մեջ են մտել պահեստում թաքնված հանցագործների հետ: 8-10 րոպե անց կրակը դադարել է, հանցագործները հանձնվել են, սակայն 8 զինվորներից 3-ը մտել են հաստատություն և միանգամայն անարդարացիորեն կրակոցների շարք արձակել:
Ընդհանուր առմամբ փոխհրաձգության հետևանքով զոհվել է 22 ենթադրյալ հանցագործ: Հետաքննությունը փորձում է պարզել, թե նրանցից քանիսին են սպանել 3 մեղադրյալները:
Դեպքը տեղի էր ունեցել հունիսի 30-ին՝ կենտրոնական Մեխիկո նահանգի տարածքում: