ԱՄՆ իրավապահ մարմինները վնասազերծել են ցանցահենների խմբի, որը խոշորագույն ամերիկյան ընկերություններից գողացել է 100-200 մլն դոլարի մտավոր սեփականություն: Ինչպես հայտնել է ԱՄՆ արդարադատության նախարարությունը, ցանցահենները ամերիկյան բանակից գողացել էին նաև ռազմական ուղղաթիռների օդաչուների նախապատրաստման ծրագրերը: Այս մասին փոխանցում է ITAR-TASS-ը:
Խմբավորման 4 անդամներ ձերբակալվել են: Նրանցից 3-ը ԱՄՆ քաղաքացիներ են, 1-ը՝ Կանադայի: Նրանցից կրտսերը 18 տարեկան է, իսկ ավագը՝ 28: Խուզարկությամբ նրանցից առգրավվել է 650 հազար դոլարի կանխիկ գումար և այլ ունեցվածք: Ձերբակալվածներից 2-ն արդեն ճանաչել են մեղքը, ընդ որում՝ կանադացին դարձել է առաջին օտարերկրացին, ով ընդունել է համակարգչային խարդախությանն առնչվող ամերիկյան մեղադրանքը: Վճիռը կկայացվի 2015-ի հունվարի 13-ին:
Ձերբակալվածները հանցակիցներ են ունեցել արտերկրում: Քննիչները կարծում են, որ 2011-ի հունվարից 2014-ի մարտ ընկած ժամանակահատվածում նրանք ապօրինի ներխուժել են Microsoft, Epic Games, Valve, Zombie Studios ընկերությունների, ինչպես նաև ամերիկյան բանակի համակարգչային ցանցեր և գաղտնի տեղեկություններ գողացել: