Ռուսաստանը և Չինաստանը ցանկանում են վերանայել աշխարհակարգը, որը հաստատվել է Երկրորդ համաշխարհային պատերազմից հետո: Սակայն նրանք պետք է իմանան, որ ԱՄՆ-ը իր դաշնակիցներին ուղղված սպառնալիքներին կարող է պատասխանել ռազմական մեթոդներով: Այս մասին գրում է ITAR-TASS-ը՝ վկայակոչելով ԱՄՆ պաշտպանության փոխնախարար Բոբ Վորքին:
«Նախևառաջ՝ միանգամայն պարզ է, որ այդ երկու երկրները ամրապնդում են դիրքերն իրենց սահմանների կողքին: Եվ դա այն բաներից մեկն է, որոնց ուղղությամբ մենք պետք է աշխատենք հաջորդ մի քանի տարիներին՝ այն բանի ֆոնին, թե որ ոլորտներն են նրանք համարում իրենց համար կենսական կարևոր»,- ասել է Վորքը:
Նրա խոսքերով՝ Վաշինգտոնը պետք է միջոցներ գտնի՝ համոզվելու համար, որ Պեկինի և Մոսկվայի մտադրությունները չեն հանգեցնի «նրանց կողմից ուժի կիրառման, ինչն էլ մեզանից պատասխան կպահանջի՝ ռազմական ուժի գործածմամբ»:
Վորքի կարծիքով՝ «այդ երկու երկրները վստահաբար ենթադրում են, որ վերջին 70 տարվա ընթացքում հաստատված աշխարհակարգի որոշ ասպեկտներ նրանք կցանկանային փոխել»:
