Մարդու իրավունքների եվրոպական դատարանի դատավորի պաշտոնում առաջադրված 14 թեկնածուներից մրցույթի հաջորդ` հարցազրույցի փուլ են անցել միայն 13-ը: Միակ թեկնածուն, ով մրցութային հանձնաժողովի որոշմամբ չի հաղթահարել փաստաթղթային փուլը Սըրիի միջազգային իրավունքի կենտրոնի տնօրեն, Սըրիի համալսարանի դասախոս Արման Ֆրեդերիկի Սարվարյանն է: Այս մասին տեղեկացնում է ՀՀ Արդարադատության նախարարությունը:
Ի դեպ, մրցութային հանձնաժողովը որոշել է նաև առաջին փուլը հաղթահարած թեկնածուների հարցազրույցի օրը: Այն կկայանա հոկտեմբերի 6-ին` ժամը 10.00-ին, Հայաստանի Հանրապետության վճռաբեկ դատարանի գրադարանի դահլիճում:
Ի դեպ, հարցազրույցի փուլը կարող է նաև մի քանի օր տևել, քանի որ գործող կարգի համաձայն, հանձնաժողովն իրավունք ունի յուրաքանչյուրթեկնածուի հարցաքննել մինչև 2 ժամ:
Ինչ վերաբերում է մրցույցթի ընթացքը հասարակությոնից գաղտնի պահելու մասին հայտարարություններին, ապա Արդարադատության նախարարությոնից հայտնում են, որ զանգվածային լրատվության միջոցների և հասարակական կազմակերպությունների ներկայացուցիչները կարող են մասնակցել մրցույթի հարցազրույցի փուլին: Դրա համար հոկտեմբերի 3-ը, ժամը 18.00-ն պետք է համապատասխան դիմում ներկայացնեն ԱՆ աշխատակազմին:
Սակայն, նրանք իրավունք չեն ունենա տեսանկարահանել կամ ձայնագրել հարցազրույցի ընթացքը:
Նախարարությոնից հայտնում են, որ լրագրողներին ու ՀԿ ներկայացուցիչներին կհատկացվի առանձնացված տարածք` առանց տեսաձայնագրման և լուսանկարահանման սարքերի ներկա գտվելու համար, ինչպես նաև հարցազրույցի անցկացման դահլիճին կից գտնվող տարածք՝ ապահովված հարցազրույցին առցանց հետևելու և տեսաձայնագրում իրականցնելու տեխնիկական հնարավորություններով: Դե իսկ հարցազրույցի ընթացքը խոչընդոտելու դեպքում զանգվածային լրատվության միջոցի կամ հասարակական կազմակերպության ներկայացուցիչը, հանձնաժողովի որոշմամբ, կարող է դուրս հրավիրվել՝ զրկվելով դրա հետագա ընթացքին հետևելու հնարավորությունից:
