Ազգային ժողովի պատգամավոր Նիկոլ Փաշինյանը չի հավատում, որ գործող իշխանությունը ի վիճակի է երկրում բարեփոխումներ իրականացնել։ Նրա խոսքով՝ եթե իշխանությունը բարեփոխում է անում, ապա կոնկրետ շահ է հետապնդում։ Ընդդիմադիր գործիչն «Ազատության» հետ զրույցում ափսոսանք է հայտնել, որ բարեփոխում բառը «վարկաբեկումների է ենթարկվում»։
«Տեսեք՝ թվում է, թե շրջանառության հարկի մասին օրենք ընդունվեց, որտեղ հարկը 3 տոկոսից դարձվեց 1.5 տոկոս, բայց հիմա պարզվում է, որ այն 3 տոկոսը ավելի լավ էր կոնկրետ գործարարությամբ զբաղվող մարդկանց համար, քան 1.5 տոկոսը։ Այսինքն՝ իշխանությունն իր բովանդակությամբ որևէ բարեփոխման ի վիճակի չէ, և եթե նա ինչ-որ բան անում է, նշանակում է՝ հետապնդում է իր կոնկրետ շահը, ընդ որում, էդ շահը պարտադիր մի ինչ-որ կետի պետք է հնարավոր լինի արտահայտել՝ կոնկրետ դոլարով, եվրոյով կամ, ասենք, թանկարժեք մետաղներով։ Կարծես թե փորձ է արվում ստեղծել մի իրավիճակ, որ քաղաքացիները որ ուղղությամբ էլ գնան՝ հայտնվեն նույն տեղում», – ասել է Փաշինյանը։
Հոկտեմբերի 10-ի հանրապետական հանրահավաքին ընդառաջ սեպտեմբերի 25-ից ոչ իշխանական եռյակը հանրահավաքներ սկսեց Հայաստանի մարզերում։ Փաշինյանը նշում է, որ եռյակն արդեն չորս մարզային հանրահավաք է անցկացրել, բայց մինչ օրս իր քաղաքական պահանջը չի ձևակերպել։
Մանրամասները՝ «Ազատություն» ռադիոկայանի կայքէջում
