Բրիտանական Բրադֆորդ քաղաքում ողբերգական դեպք է պատահել: Մթերային խանութի սեփականատեր, 48-ամյա Էնթոնի Ուոթերսը կախվել է այն բանից հետո, երբ գազի տեղական ծառայությունը նրանք 5 հազար ֆունտի հաշիվ է ներկայացրել: Ուոթերսը պետծառայողներին սպառնացել է, որ ինքնասպան կլինի, սակայն նրան չեն հավատացել, գրում է Mirror-ը:
British Gas պետական ընկերության աշխատակիցները Ուոթերսին հայտարարել են, որ կանջատեն ջեռուցման համակարգը, եթե վերջինս կարճ ժամանակում չվճարի իր պարտքը: Բրիտանացին հայտարարել է, որ ինքը միայն հազար ֆունտ ունի:
«Եթե գազն անջատեք, ինքնասպան կլինեմ»,- բղավել է նա պետծառայողների հետևից:
Շուտով խանութի սեփականատերը իրականացրել է իր սպառնալիքները: Նա փակել է խանութը և կախվել պահեստում:
Ուոթերսի ծնողները, ովքեր մի քանի տարի առաջ նրան են հանձնել ընտանեկան բիզնեսը, դատարան են դիմել գազային ընկերության դեմ, որը չի կարողացել իրենց որդու խնդիրների լուծման համար ավելի մարդասիրական լուծում առաջարկել:
British Gas-ի ներկայացուցիչները հայտարարել են, որ շատ են զղջում կատարվածի համար, և խոստացել են Էնթոնիին մահվան դուռը հասցրած իրենց աշխատակիցների նկատմամբ հետաքննություն սկսել: