ԱՄՀ-ն կփորձի ՀՀ կառավարությանը կառուցվածքային քաղաքականության պայմաններ ներկայացնել՝ մենաշնորհներին աջակցելուց խուսափելու նպատակով: Այսօր այս մասին ասաց ԱՄՀ հայաստանյան առաքելության ղեկավար Մարկ Հորթոնը:
«Առաջին լրատվական»-ի հարցին՝ միջազգային կառույցները, այդ թվում՝ ԱՄՀ-ն, Հայաստանում բարեփոխումների նպատակով վարկեր տրամադրելով, ժամանակ առ ժամանակ խոսում են նաև այն մասին, որ Հայաստանի տնտեսությունը մենաշնորհված է, օլիգոպոլացված, որից հետո շարունակում են վարկերի տրամադրումը՝ դրանով իսկ աջակցելով նույն այդ մենաշնորհների զարգացմանն ու ՀՀ արտաքին պարտքի աճին, ինչո՞ւ գործուն քայլեր չեն իրականացվում այս խնդիրը վերացնելու ուղղությամբ, այսինքն՝ ինչո՞ւ գումարներ չեն տրամադրվում որոշակի նախապայմանների դիմաց, պարոն Հորթոնը պատասխանեց, որ որոշ սուբյեկտների կողմից շուկայում գերիշխող դիրքի խնդիրը հնարավոր է լուծել որոշակի ոլորտներում վճռորոշ և վճռական քայլերի միջոցով: Մարկ Հորթոնը նշեց, որ առաջարկը՝ միջազգային ֆինանսական կառույցների ֆինանսավորումն ավելի հասցեական դարձնելու մասին, հետաքրքիր է, որպեսզի այդ ֆինանսավորումը չսնուցի մենաշնորհներն ու օլիգոպոլիաները:
«Բնականաբար, մեր մտադրությունը դա չէ: Ընդհակառակը՝ մենք ցանկանում ենք, որ լինեն խաղի հավասար պայմաններ հարկահավաքման, պետական եկամուտների վարչարարության մեջ, որպեսզի կառույցներն ու ինստիտուտներն ավելի ուժեղ լինեն, որպեսզի որոշ առումներով կարգավորումը թուլացվի, քանի որ որոշ դեպքերում չափազանց խիստ կանոնակարգումից ավելի շատ շահում են նրանք, ովքեր ավելի սերտ կապեր ունեն իշխանության հետ: Կարևորում ենք պետական կառավարման և պետական ծախսերի ոլորտներում թափանցիկության մակարդակի լրացուցիչ բարձրացումը:
ԱՄՀ-ի վարկավորման գործիքը բավական նեղ շրջանակ ունի. դա տրամադրվում է ԿԲ-ին Արտարժութային պահուստների մակարդակն ապահովելու նպատակով միայն: Ճգնաժամի տարիներին մենք աշխարհի տարբեր երկրներում սկսեցինք ուղղակիորեն ֆինանսավորել պետական բյուջեն, այդ թվում՝ Հայաստանի: Նախորդ ծրագրի ֆինանսավորման կեսն անմիջականորեն տրամադրվել էր պետբյուջեին, սակայն դա ավարտվել է, ու հիմա մեր ֆինանսավորումը բացառապես տրամադրվում է Կենտրոնական բանկին, որը պարզապես սահմանափակում է մեր վարկերի տրամադրման շրջանակը, խողովակները և վարկավորման ազդեցության հնարավոր ոլորտը»,- ասաց Հորթոնը՝ շարունակելով, որ կարող են փորձել կառուցվածքային քաղաքականության պայմաններ ձևակերպել, որոնց շնորհիվ կբարձրանա թափանցիկության մակարդակը, մրցակցության, խաղի պայմաններն ավելի հավասար կլինեն: