Լոռու մարզի ընդհանուր իրավասության դատարանում Մուշեղ Հարությունյանի նախագահությամբ ավարտվել է Արտյոմ Շ.-ի գործի դատական քննությունը:
Ըստ մեղադրանքի՝ 31-ամյա Արտյոմը 2014 թվականի մայիսի 18-ին, ժամը 13-ի սահմաններում իրենց տանը կենցաղային վիճաբանության ժամանակ ձեռքով երկու անգամ հարվածել է կնոջ դեմքին ու գլխին, այնուհետև տաք շամփուրով չորս անգամ հարվածել է կնոջ ձախ ձեռքին և նրա առողջությանը պատճառել թեթև վնասի հատկանիշներ չպարունակող վնասվածքներ:
Նախաքննության ժամանակ Արտյոմն իրեն մեղավոր չի ճանաչել ու հայտնել է, թե 2008 թվականին իրենք ամուսնացել են, 2009 թվականին ծնվել է իրենց որդին: Դատավարության պահին էլ կինը հղիության 7-րդ ամսում է:
Դեպքի օրվա կեսօրին ինքը խոհանոցում որդու հեծանիվի պլաստմասսայե լապտերը ամրացնում էր հեծանիվին՝ մետաղե բարակ, տաքացված լարով հալեցնելու միջոցով:
Այդ ժամանակ կինն ասել է, թե հորեղբայրը հրավիրել է դստեր հարսանիքին:
Ինքը կնոջն ասել է, որ չի ցանկանում մասնակցել հարսանիքին, քանի որ չի ուզում շփվել նրա հորեղբոր հետ, բացի դրանից՝ իրենք փող չունեն նվեր գնելու համար:
Կինը խնդրել է թույլ տալ, որ մոր ու եղբոր հետ գնա հարսանիք: Ինքը մերժել է: Այդ ժամանակ կինը սկսել է վիրավորական արտահայտություններ անել իր քրոջ ու ծնողների հասցեին, վերջիններիս անվանել է «անբարոյական», իսկ իրեն անվանել է… «չուչել»:
Ինքը զայրացել է, սաստել է կնոջը, բայց նա շարունակել է վիրավորել: Այդ ժամանակ ինքը հունից դուրս է եկել, տաք լարը ձեռքին՝ գնացել է դեպի կինը: Ասել է, որ ձայնը կտրի, բայց կինն առաջ է եկել: Նույն պահին տաք լարը դիպել է նրա ձեռքին: Հետո ինքը հրել է կնոջը, շամփուրով չի խփել, չի ծեծել նրան:
Դատական քննության ժամանակ Արտյոմն իրեն դարձյալ մեղավոր չի ճանաչել: Ասել է, որ կնոջ վիրավորական արտահայտությունների պատճառով ձեռքի տաք լարով մի անգամ խփել է նրա թևին, այդ խփելն էլ դիտավորյալ չի եղել, ինքը լարը թափահարել է, այն պատահաբար դիպել է կնոջ ձեռքին:
Դատարանը Արտյոմի պատճառաբանությունները անարժանահավատ է գնահատել:
Տուժող կինը հայտնել է, թե վեց տարվա համատեղ ամուսնության ընթացքում Արտյոմն ու ինքը հաճախակի են վիճել, Արտյոմը մի քանի անգամ ծեծել է իրեն:
Դեպքի օրն ամուսինն արգելել է գնալ հորեղբոր աղջկա հարսանիքին, ասել է, թե չի ուզում շփվել իր հարազատների հետ: Ինքը նեղացել է: Արտյոմն իրեն «փողոցային» է անվանել:
Չցանկանալով վեճը շարունակել՝ ինքը փոխել է թեման, ասել է, թե մանկապարտեզում որդուն օղակ է անհրաժեշտ, խնդրել է, որ ամուսինը օղակ գնի:
Արտյոմը զայրացել է, ասել է, թե ո՛չ օղակ է գնելու, ո՛չ հարսանիք է գնալու: Երկու անգամ խփել է իր գլխին:
Ինքը խնդրել է իրեն չվիրավորել ու չխփել, սպառնացել է, թե կամուսնալուծվի: Արտյոմը տաք շամփուրով չորս անգամ խփել է իր ձախ ձեռքին՝ պատճառելով ուժեղ ֆիզիկական ցավ: Եվ դուրս է եկել տնից: Այդ ժամանակ ներկա էր իրենց անչափահաս որդին:
Ինքը հեռախոսով կատարվածը պատմել է իր մայրիկին ու եղբորը: Նրանք եկել և տարել են իրեն ու երեխային:
Տուժողի պահանջն այն էր, որ Արտյոմը ենթարկվի քրեական պատասխանատվության:
Ընդհանուր իրավասության դատարանը Արտյոմ Շ.-ին մեղավոր է ճանաչել ՀՀ քրեական օրենսգրքի 118 հոդվածով ու դատապարտել է 100 հազար դրամ տուգանքի:
