Այսօր ոչ իշխանական քառյակի՝ իշխանություններին տված ժամկետի ավարտն է: Մի քանի ամիս առաջ քառյակը իշխանություններին ուղղված 12 կետից բաղկացած պահանջներ էր ներկայացրել և որպես դրանց կատարման ժամկետ նշել էր սեպտեմբերի 30-ը: Արդյոք իշխանությունները կատարել են այդ պահանջները: «Եթե մեկ բառով եք ուզում՝ ոչ»: Կա կետ, որ կարելի է ասել, թե ինչ-որ բան չնչին չափով արվել է, բայց մեծ հաշվով չի կատարվել»,- «Առաջին լրատվական»-ի հետ զրույցում ասաց «Բարգավաճ Հհայաստան» խմբակցության անդամ Ստեփան Մարգարյանը:
Ս.Մարգարյանը, սակայն, չցանկացավ ասել, թե ոչ իշխանական ուժերն այդ դեպքում ինչ են պատրաստվում անել: Արդյոք նորից վարչապետի հրաժարական կպահանջեն, ինչպես դա անում էին գարնանը: Չէ՞ որ իշխանությունները չեն կատարել իրենց պահանջները: Դրան հավելելով նաև այն հանգամանքը, որ մեծ թվով առևտրականներ դուրս են եկել փողոց և պայքարում են իշխանությունների դեմ՝ Շրջանառության հարկում կառավարության կատարած փոփոխությունների պատճառով: Ս.Մարգարյանը պատասխանեց, թե այդ հարցերին կանդրադառնան հոկտեմբերի 10-ի հանրահավաքի ժամանակ: Եվ անդրադառնալով առևտրականների դժգոհություններին՝ նա ասաց, թե երբ Ազգային ժողովում քննարկվում էր այդ նախագիծը, իրենք ասում էին, որ այն դժգոհություններ է հարուցելու: «Մենք ասում էինք, որ դա չի աշխատի, հանեք փաստաթղթավորման մասը, դա նպատակին չի ծառայում, չհամաձայնեցին»,- եզրափակեց Ս.Մարգարյանը: