Հունաստանի նախագահի հետ համատեղ մամուլի ասուլիսի ընթացքում Սերժ Սարգսյանը հայտարարել է, որ Եվրասիական միությանն անդամակցելուց հետո Հայաստանը գրավիչ կդառնա արտասահմանյան ներդրողների համար:
Հայաստանի իշխանությունների այս դիրքորոշումը մոտավորապես այն է, ինչ տարիներ առաջ Տիգրան Սարգսյանն էր հայտարարում համաշխարհային ճգնաժամի պայմաններում: Նա ասում էր, որ ճգնաժամն աշխարհում գրավիչ կդարձնի Հայաստանի տնտեսությունը, և այստեղ կհոսի կապիտալը՝ որպես խաղաղ նավահանգիստ: Կապիտալը չհոսեց Հայաստան՝ գերադասելով մնալ, այսպես կոչված, փոթորկվող աշխարհում:
Այսօր Սերժ Սարգսյանն ըստ էության նույն բանն է կրկնում, պարզապես յուրօրինակ տեղափոխումով՝ կապիտալը խաղաղվող աշխարհից կհոսի ճգնաժամային Եվրասիական միություն: Աբսո՞ւրդ է: Իհարկե՝ աբսուրդ է, սակայն Հայաստանի իշխանությունները միգուցե մտածում են, որ եթե ճգնաժամային աշխարհից կապիտալը չհոսեց խաղաղ Հայաստան, միգուցե խաղաղվող աշխարհից՝ տնտեսական կայունացման իմաստով խաղաղվող, կհոսի ճգնաժամային Եվրասիական միություն: Ի վերջո՝ գալ Հայաստան նշանակելու է գալ Եվրասիական միություն: Այսպիսով՝ իշխանություններն ըստ էության մտածում են, որ միգուցե ճգնաժամային Հայաստանը գրավիչ կլինի համաշխարհային կապիտալի համար:
Խնդիրն այն է, որ Եվրասիական միություն մտնելը նշանակում է մտնել ճգնաժամի մեջ՝ այն պարզ պատճառով, որ այս միության առաջամարտիկ կամ դրոշակակիր համարվող ռուսաստանյան տնտեսությունը գտնվում է չափազանց ծանր վիճակում՝ արևմտյան պատժամիջոցների պատճառով: Եվ այս պատժամիջոցներն ըստ էության արդեն իսկ զգալի ազդեցություն են թողնում ռուսաստանյան տնտեսության վրա: Սրան զուգահեռ՝ նվազում են նավթի համաշխարհային գները, ինչը մյուս կողմից է հարվածում ՌԴ տնտեսությանը:
Նման պայմաններում ՌԴ հետ կապված կամ միայն ՌԴ շուկայի հույսին գտնվող տնտեսությունները անկարող են խուսափել կորուստներից: Եվ ահա Սերժ Սարգսյանը կարծում է, որ համաշխարհային կապիտալը պետք է գա դեպի այս հեռանկար գնացող Հայաստան: Այլ կերպ ասած՝ սա նշանակում է, որ ըստ Սերժ Սարգսյանի՝ համաշխարհային կապիտալը խելացնոր կապիտալ է և պատրաստ է, այսպես ասած, «գրողի ծոցը» գալ և հայտնվել արևմտյան պատժամիջոցների հարվածների տակ գտնվող տնտեսական միջավայր:
Միայն Հայաստանի իշխանությունների հայտարարություններն այն մասին, որ ԵՏՄ գնացող Հայաստանն ավելի գրավիչ կդառնա արտաքին ներդրողների համար, այն էլ այն դեպքում, երբ Հայաստանն ուղիղ ցամաքային սահման չունի Եվրասիական միության հետ, ի հավելումն Ռուսաստանի տնտեսական խնդիրների, արդեն իսկ բավական է արտերկրի ներդրողներին զգուշանալու համար: Որովհետև Սերժ Սարգսյանի հայտարարությունը տնտեսապես ոչ ադեկվատ հայտարարություն է, իսկ նման հայտարարությունները խոսում են ընդհանրապես երկրի վիճակի մասին, եթե հնչում են նախագահական մակարդակով:
Այսինքն՝ Սերժ Սարգսյանն ըստ էության իր հայտարարությամբ իսկ համաշխարհային կապիտալին ցույց է տալիս, որ պետք չէ գալ Հայաստան: Եվ եթե սրան գումարվում են պատժամիջոցների արդյունքում Ռուսաստանի տնտեսության խնդիրները, ինչպես նաև Հայաստանի և ԵՏՄ հիմնական, այսպես ասած, մայրցաքամային մասի ուղիղ սահմանի բացակայությունը, ապա պարզ է դառնում, որ միջազգային բիզնեսի համար Հայաստանը դառնում է ոչ թե գրավիչ, այլ հակառակը՝ Հայաստանը գրավչությունը կորցնում է իշխանությունների ոչ ադեկվատ գնահատականների պայմաններում:
Եվ ուրեմն՝ Հայաստանի համար բիզնես-վարկի տեսանկյունից շատ ավելի նախընտրելի, գոնե չարյաց փոքրագույնը կլինի այն, որ այլևս չհնչեն նմանօրինակ հայտարարություններ, և Հայաստանն ինչքան հնարավոր է լուռ անդամակցի Եվրասիական միությանը: Հավատացեք, այդ լռությունը գոնե ինչ-որ բան կասի միջազգային ներդրողներին հայաստանյան իշխանությունների ադեկվատության առումով, այն տեսանկյունից, որ գոնե հասկանում են, թե ինչ են անում պետության հետ և լռում են:
