Չինաստանում Instagram-ի մասնակի արգելափակման մասին լուրերի ֆոնին սեպտեմբերի 29-ին երկրի առաջին տիկին Պեն Լիյուանի էջում հայտնվել է լուսանկար, որում նա կանգնած է իր ամուսնու՝ երկրի նախագահ Սի Ցզինպինի հետ: Այս մասին հայտնում է That’s Beijing ամսագիրը:
Որոշ օգտատերեր բավական հեգնական տոնով նկարը մեկնաբանելիս գրել են. «խնդրում եմ, կիսվեք ձեր ծրագրային ապահովմամբ»:
Instagram-ի արգելափակման մասին առաջին հաղորդագրությունները տարածվել են սեպտեմբերի 28-ին: Նշվում էր, որ օգտատերերը կարողանում են մտնել իրենց էջ, բայց որևէ կոնտենտ ավելացնել չեն կարող:
South China Morning Post-ի տեղեկությամբ՝ արգելափակումների հետ կապված՝ Հոնկոնգի բնակիչները սկսել են իրենց բջջային սարքերում օգտագործել FireChat հավելվածը, որը կարող է աշխատել առանց համացանցի և բջջային կապից դուրս: Միայն վերջին օրերին FireChat է ներբեռնել Հոնկոնգի մոտ 100 հազար բնակիչ:
Occupy Central անունը կրող չարտոնված փողոցային ակցիայի մասնակիցները հանդես են գալիս ժողովրդավարական ընտրությունների օգտին: Ցույցերը սկսվել են, երբ Պեկինը սահմանել է, որ Հոնկոնգում 2017թ. ընտրություններում ղեկավար պաշտոնների կարող են հավակնել միայն իշխանության կողմից ստուգված թեկնածուները, և որ չնայած Հոնկոնգին իրավունք կտան մի քանի թեկնածուից ընտրություն կատարելու, այնուամենայնիվ՝ նրանց կորոշի ու կհաստատի Պեկինը:
Պեկինում հայտարարել են, որ չեն պատրաստվում զիջումների գնալ:
Իսկ Occupy Central-ի կազմակերպիչները հայտարարել են, որ իշխանություններին մինչև հոկտեմբերի 1-ը ժամանակ են տալիս, որպեսզի կա՛մ բավարարեն իրենց պահանջները, կա՛մ Հոնկոնգի վարչության ղեկավար Լյան Չժենյինը լքի պաշտոնը:
