Իսպանիայի թագավորական տունը հաջորդ տարի իր կեցության համար հարկատուներից մոտ 8 մլն եվրո կստանա, իսկ կառավարության ղեկավար Մարիանո Ռախոյը՝ 80 000 եվրոյից քիչ: Այս մասին հայտնում է El Pais թերթը:
Արքայական տան բյուջեն 2015-ին կկազմի 7,78 մլն եվրո՝ ճիշտ նույնքան, որքան այս տարի: Այս թիվը նշված է երկրի պետբյուջեում, որը ներկայումս դրված է կոնգրեսի քննարկմանը: Բացի դրանից՝ վերջերս ընդունված օրենքի համաձայն՝ Արքայական տունը պարտավոր կլինի իր ծախսերի մասին զեկուցել քաղաքացիներին:
Իսպանիայի վարչապետ Մարիանո Ռախոյը 2015 թ. կստանա 78 185 եվրո՝ նույնքան, որքան նա վաստակում է վերջին 4 տարիներին: Նրա կառավարության նախարարների աշխատավարձը 68 981 եվրո է: Քիչ ավելի շատ կստանա կառավարության ղեկավարի առաջին տեղակալ Սորայո Սաենս դե Սանտամարիան՝ 73 486 եվրո:
Եկող տարի Գերագույն դատարանի ղեկավար Կառլոս Լեսմեսը կվաստակի 130 152 եվրո, իսկ երկրի բարձրագույն սահմանադրական մարմնի ղեկավար Ֆրանսիսկո Պերես Կոբոսը՝ 129 271 եվրո:
Պաշտպանական ծախսերը 2015-ի համար ավելացրել են 1%-ով՝ 5,7 մլրդ եվրո: Թոշակների, գործազրկության նպաստների, պետական պարտքի մարման համար հատկացվել է պետբյուջեի ծախսերի կեսից ավելին (55,33%)՝ 192,4 մլրդ եվրո: